Kangerlussuup aqutsivigineqarnissaanut pilersaarusiaq naammassivoq

Tassa nuna, uumasut aamma kulturikkut pingaartinneqartut, eriagineqarnissaat, aamma nunami tamaani aallaaniarnerup, takornariaqarnerup, aalisarnerup allatullu inuussutissarsiornerup ingerlanneqarsinnaanissaanut pilersaarut periarfissiivoq.

Aqutsinissamut pilersaarummi nuna tamanna pingasunngorlugu agguarneqarpoq:

Kangerlussuup avannaani nuna uumasullu pingaartinneqarnerupput. Tamanna soorlu masarloqarfiuvoq, nerlerit timmissallu allat uumaffigisaat, tuttullu piaqqisarfiat.

Takornariaqartitsinerup Kangerlussuup eqqaanit sermersuup tungaanut pisinnaanera pingaartinneqarpoq. Umimmannik takornariartitsisarnissaq pinerullugu tamaani aallaaniartoqaqqusaanngilaq.

Kangerlussuup kujasinnerusortaani aallaaniarsinnaanissaq akuerineqarpoq. Tamaani tuttorpassuaqarlunilu umimmappassuaqarpoq. Tamaaniippoq nuna eqqissisimatitaq, aammali aatsitassanik ujaasiffiusoq. Alcoap pilersaarutaa piviusunngortinneqassappat ilaatigut tamanna attupillanneqartussaavoq.

Nunami Namminermi Pissutsinut Naalakkersuisoqarfik aamma Pinngortitamik Aqutsisoqarfik, aqutsinissamut pilersaarusiortuupput taamaasiornermilu Aalisarnermut, Piniarnermut Nunalerinermullu Aqutsisoqarfik, Qeqqata Kommunia, GTE kiisalu KNAPK suleqatigineqarput.