Kangerlussuarmi pissutsit iluarsillaqquaat

Kangerlussuarmi angallannikkut pissutsit maannangaaq iluarsineqartariaqalersut, Kangerlussuarmi nunaqarfinni aqutsisut siulittaasuat Fritz Baumann oqarpoq. Taamaalillunilu Demokraatit Naalakkersuisunik apeqqusiinerat taperserpaa.

Naalakkersuisut angallannikkut politikkeqarnersut Demokraatinit apeqquserneqarpoq, ilaatigut Kangerlussuarmi angallannikkut pissutsit pitsaannginnerarlugit qanorlu Naalakkersuisunit pilersaaruteqartoqarnersoq Demokraatinit apeqqutigineqarpoq.

- Demokraatit oqariartuutaat ilisarnarpoq. Kangerlussuarmi pissutsit iluarsisariaqarnerarlugit, pingaartumik takornariat amerliartuinnarnerat eqqarsaatigalugu, qangaanilli oqariartuuteqartarpugut, qanittunnguaq allaat tikillugu tusagassiutitigut ilanngussaqartarpugut. Kangerlussuarmi nunaqarfimmi aqutsisut siulittaasuat Fritz Baumann oqarpoq.

Fritz Baumann aamma oqarpoq, Kangerlussuarmi hoteli tikittartunut amerliartuinnartunut naammakkunnaalersimasoq.

Unnuisarnerit pillugit kisitsisit 2006-imeersut saqqummiunneqaqqammersut naapertorlugit, Kangerlussuarmut tikittartut 20.000-it sinnerpaat, taamaalilluni ukiunut siuliinut naleqqiullugu qaffariaat 50 %-i sinnersimallugu.

- Taamaattumik ukioq manna timmisartuussinissat amerleriaateqarmata takorloorneqarsinnaalereerpoq, Kangerlussuarmi unnuisartut amerliallaqqissasut. Tikittartut amerliartuinnarnerat qujanaraluarluni aappaatigooqarpoq, tassami Kangerlussuarmut aningaasaliissutaasartut amerlineqartariaqaleraluarmata pissutsinik pitsanngorsaasoqassappat. Kangerlussuarmummi tikittartut amerlalluinnaraangata tattorliuuttoqavissortarmat. Fritz Baumann oqarpoq.