Kangerlussuarmi pisoq Jøkelløb-imik taaguuteqarpoq
Ilisimatooq silap pissusaanut paasissutissat misissuataareerlugit ima oqarpoq:
- Erngup taama annertutigisup kuunneranut, Kangerlussuarmi ulluni kingullerni kiannera kisimi patsisaanavianngilaq.
- Silap kiannera aamma sermip aanneraneersoq imeq sermersuup iluani imaluunniit naqqani tasinngortannguuttoq pissutaasimassapput. Tamakkuninnga ilisimasallit pisoq tamanna Jøkelløb-imik taaguuteqartippaat, Sebastian Mernild nassuiaavoq.
Sermip aanneranit tasinngortanngortut juunimi juulimilu pilersinneqartarput, tasinngortannguuttullu naqitsinerat angivallaaleraangat imeq kuuttorsuanngortarluni. Tasinngortannguuttut qanoq annertutiginerat kisitsisitaleruminaappoq, tamakkuli annertoorujussuusinnaasarput, taanna nassuiaavoq.
Nunatsinni taama pisoqartarnera nutaajunngilaq, taamami pisoqartarnera 1980-ikkunni takuneqartareerpoq.
- Taamanili pisut maanna takusatsitut annertutiginngillat. Tassami tasinngortannguuttut kuuleraangata tamanna sakkortoorujussuusinnaasarpoq, Sebastian Mernild oqarpoq.
Silap pissusaanik issittumillu ilisimasalik naliliivoq, kiatsikkiartornera ilutigalugu taama pisoqartarnera akulikinnerulerlunilu sakkortunerulissasoq.