Kangerlussuarmi Pilersuisup pisiniarfia oquttunik tuniniaasoq

Nunatsinni nunaqarfiit annersaanni, Kangerlussuarmi Pilersuisup pisiniarfia paarinerlunneqarpoq, tamannalu Kangerlussuarmi takornariaqarnermut ajoqusiivoq, Kangerlussuarmi innutaasut saaffiginissutaat aallaavigalugu Kalaallit Nunaanni Atuisartut Siunnersuisoqatigiit Pilersuisumut allagaqarnerminni taamatut allapput.

-Pisiniarfimmi ilitsiviit ilai allaaneq ajorput ”Ruslandimi illoqarfiiit ilaanni pisiniarfik.

Atuisartut Siunnersuisoqatigiit naapertorlugit, Kangerlussuarmi innuttaasut ilat taama oqarput.

Kalaallit Nunaanni Atuisartunut Siunnersuisoqatigiivi Kangerlussuarmilu innuttaasut qulit missaanniittut ataatsimiinnerminnni eqqartugaasa ilagaat nioqqutissat ullussaminnik qaangiisimasut, naatitat oquttut naatitat nutaat akornanniittut, meeqqanut inersimasunullu atisat ullutsinnut naleqqutinngitsut, tassa qanganisarpaluttut,nioqqutissat immunnik akullit Sisimiuniit akisunerunerit, naak timmisartukkut Kangerlussuaq aqqusaarlugu ingerlanneqarsimagaluartut.

Atuisartut Siunnersuisoqatigiiffiata isornartorsiuinera KNI-mit akineqareerpoq, akissulli atuisartut pisisartullu naammaginngilluinnarpaat.

-Nioqqutissat ullussaminnik qaangisimasut akikillillugit pisiniarfiup tuniniartassagai aalajangiusimavarput – ullussaminnik qaangiisimanerat allagarsiinermi ilanngunnagu. Iipilit naatsiiallu asiunikut peerneqarneq ajornerat aamma isornartorsiorneqarpoq, taakkuli nutaat akornanni uninngatiinnarneqartarput, Kalaallit Nunaanni Atuisartunut Siunnersuisoqatigiit siulittaasuat, Nikolaj Ludvigsen oqarpoq.