Kangerlussuarmi norskinik ujaasineq suli kinguneqaqqinngilaq
Kangerlussuarmi norskinik tammaaneqartunik ujaasinermi nutaanik nutaarsiassaqanngilaq.
Politimesterip tullia Morten Nielsen oqaluttuarpoq, ippassaq nammattakkanik pingasunik, madrasinik pullattakkanik pingasunik avalequtiminernillu qilersorneqarsimasunik ipusiarineqarsimasinnaasunik nassaarnerup kingorna ilimagineqalersoq norskit kuuk umiarluusiamik ikaarniarsimassagaat kinngullutillu.
Nammattagaq ataaseq kuup imaani nassaarineqarpoq, allallu marluk nunami, nammattakkalli marluk imaaniissimasinnaanerat nunamullu tipisimasinnaanerat mattutivinneqarsinnaanngitsot Morten Nielsen oqarpoq.
Tamatumunnga peqatigitillugu taanna oqaluttuarpoq angutip ipisimasup ippassaq nassaarineqartup misissorneqarnera suli naammassisimanngitsoq.
- Allatut ajornartumik kinaassusiata nalunaarutiginissaa mianersuulluinnartariaqarparput, tassami qulakkeerluinnartariaqaratsigu norskinut pingasunut ilaqutaasut neriulussinnartikkumanagit, Morten Nielsen oqarpoq.
Norskit aviisii oqaluttuarput norskit pingasut najugaata eqqaani Kalaallit Nunaannut ujaasinermi peqataaniarluni suliniuteqartoqartoq.
- Qanigisaasut kissaateqarnerat inuttut paasilluaqaara, taamaattorli taakkua qinnuigiumavakka maanga aallartinnatik eqqarsarluaqqaaqqullugit. Ujaasinermi misilittagaqanngilluinnartut akuliunneqarnissaat ulorianarpallaassaaq, taakkualu tammartunik ujaasinermik ilungersuuteqarnerminni ajoqutissappata alianartoq nammanneqarsinnaassanani, Morten Nielsen oqarpoq.
Ujaasineq annikillisinnagu suli ingerlanneqarallassaaq, ullumilu ualiatungaani aqaguluunniit ullaakkut aalajangerneqassaaq qanoq pisoqaqqissanersoq, Morten Nielsen naggasiivoq.
