Kangerlussuarmi mittarfik nutarterneqartariaqarpoq

- Timmisartorsuarnut mittarfeqarfik Kangerlussuarmiittoq itsarnisarpaluppallaaqaaq mikivallaarlunilu aamma utoqqarnut innarluutilinnullu naleqqutinngilaq, Atassutip taama isumaqartup timmisartoqarfimmik nutarterinissamik siunnersuutaa Inatsisartut ullumi ataatsimiinneranni Godmand Rasmussenimit saqqummiunneqarpoq.

Godmand Rasmussen oqarpoq mittarfeqarfik mikivallaalereersimasoq. Ilaasut silamik pissuteqarlutik utaqqigaangamik natermi issiasariaqartarput. USA-mut timmisartukkut attaveqalerpat mittarfiup atorneqarnerulissaaq taamaalillunilu pissutsit pitsaanerulernavianngillat.

Naalakkersuisut Inatsisartunilu amerlanerussuteqartut siunnersuut tapersersunngilaat.

- Inatsisartut ukiamut ataatsimiilerpata Nuummi mittarfissualiortoqassanersoq oqallisigineqassaaq, tamannalu akuersissutigineqassappat Kangerlussuarmi mittarfissuaq immaqa pisariaqartinneqarunnaassaaq, attaveqarnermut naalakkersuisoq Kim Kielsen oqarpoq.

Kangerlussuarmi timmisartoqarfiup nutarterneqarnissaanut Demokraatit isumaqataapput.

Nunatsinnukartartut 60 procentii Nuummut ingerlasuusartut naalakkersuisut Atassummut akissuteqaamminni ilisimatitsipput.