Politiit ullormut nalunaarutaat: Kangerlussuarmi ikuallattoqarpoq

Kangerlussuarmi Mini Marked ullaaq mannali ikuallappoq. 

Ikuallattoq suli qaminneqanngilaq, taamaammat tamaani innuttaasut Kalaallit Nunaanni Politiinit qinnuigineqarput angerlarsimaannarlutillu igalaatik matutillu matoqqatissagaat.

- Ikuallattoq pujuliorujussuartoq politiit qatserisartullu siaruatsaaliuleruttorpaat, politiit tallimanngornermut unnuaani pigaartuisa pisortaat Poul Kreutzmann oqarpoq.

Mini Markedip ikuallalerneraniit akunnialuit qaangiussimalerput - tassa ullaaq manna arfernup qaangilaaraali ikuallattoq, politiit pigaartuisa pisortaat oqarpoq.

- Taamaammat meeqqerivik ikuallattup qanittuaniittoq matoqqagallarpoq, Poul Kreutzmann oqarpoq.

Inunnik ajoqusertoqanngitsoq, politiit pigaartuisa pisortaat oqarpoq. Mini Markedillu ikuallanneranut suna pissutaanersoq suli oqaatigisinnaanngikkallaritsik, politiit pigaartuisa pisortaat ilisimatitsivoq.  

Imigassartorsimatilluni biilinik ingerlatsisimasutut pasisaqartut biiliinillu aportoqartoq

Kangerlussuarmi pisup saniatigut imigassartorsimatilluni biilinik ingerlatsisimanasorinninnermut biilinillu aportoqarneranut tunngasunik suliaqarlutik, Poul Kreutzmann ilisimatitsivoq.

Tassa angut Nuummi sisamanngornermi unnukkut biilertilluni illumut arfinermut qiteqqunnerata missaani aporpoq ajutoorfimminiillu kingorna qimaalluni.

- Angut taanna illoqarfimmi sumiiffiit ilaannittoq kingorna nassaarineqarpoq, mianersuaalliorsimasutullu aamma ajutoorfiusumut qimaasimasutut ajutoornermillu politiinut nalunaaruteqarsimanngitsutut pasineqarluni kingorna tigusarineqarluni, Poul Kreutzmann oqarpoq. 

Tamatuma saniatigut angutit marluk imigassartorsimatillutik biilinik Nuummi ingerlatsisimasutut pasineqarput. Aappaa politiinut unnukkut qulit missaanni nalunaarutigineqarpoq.

Taanna politiinit Nuussuarmi unitsinneqarami imigassartorsimatillunilu biilinik ingerlatsisimasutut pasineqarluni tigusarineqarpoq. Angut alla politiinut minutsit 15-iinnaat qaangiuttut nalunaarutigineqarpoq.

- Angut taanna 20-nik ukiuliusoq Nuup qiterpasissuani Brugsenip kommunillu akornatigoortilluni napparussuit ilaannut aporpoq, ajutoorfimminiillu kingorna qimaalluni, politiit pigaartuisa pisortaat oqarpoq.

Angut taanna Nuummi najukkat ilaanni kingorna nassaarineqarmat imigassartorsimatilluni biilinik ingerlatsisimasutut pasineqarluni tigusarineqarpoq.

Angutit marluk taakku aavat qanoq aalakoornartortaqartiginersoq paasiniarlugu aaversipput.