Kangerlussuarmi efterskole aasaru matussaaq

Atuartut atuarnerminnik unitsitsiinnartartut ukiut atuarfiut marluk ingerlaneranni amerlavallaarsimapput. Atuarfiup avatangiisinik iluameersumik peqannginnerata patsisigivaa atuarfiup illutalunnera inissisimaffilunneralu.
Allattoq Nauja Møller
februaarip 25-at 2010 10:30

Atuartut tamaasa iluameersunik pulaartarfeqartinnissaat ajornakusoorsimaqaaq, aammalu atuartitaaneq Kangerlussuup timmisartunit aqqusaartarfiunera pissutaalluni akornusersorneqartarsimalluni, Kultureqarnermut, Ilinniartitaanermut, Ilisimatusarnermut, Ilageeqaarnermullu Naalakkersuisoqarfiup tusagassiutinut nalunaarutaa taama imaqarpoq.

Kangerlussuarmi efterskole Villads Villadsenip atuarfianit aqunneqarsimavoq, siulittaasuatalu Nuka Kleemannip tusarliussimavaa efterskolemik aqutsineq ukiup atuarfiusussap tulliani ingerlateqqinniarnagu.

Efterskolemut qinnuteqarsimasut tamaasa inissaqartinneqanngitsut naalakkersuisunit nassuerutigineqarpoq. Allanillu sineriammi atajuartussamik efterskoleqalersitsinissamut periarfissat misissorneqarnerat ingerlanneqaleruttorput. Misissuinerlu ukioq ataatsimik marlunnilluunniit sivisussuseqassaaq.

Villads Villadsenip atuarfiani ukioq kingulleq inissaqanngitsut Kangerlussuup efterskoleanut inissinneqarput. Ukiullu tullissaani taamaaliortoqaqqissinnaanavianngilaq.

Taamaattumik inuusuttut 80-t Qasigiannguani efterskolernissamut utaqqisut siunnersortinnissamut ikiorneqarniassagamik, illoqarfigisaminni piareersarfik imalunniit atuarfimminni siunnersortaasoq saaffigissavaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq