Kangerlussuarmi arpattussat 77-iussapput
Arpanneq sermersuarmit 3 kilometerinik ungasissusilimmit ullaap tungaani qulinut qiteqquppat aallartissaaq, nalunaaquttallu akunneri pingasut qaangiunneranni siulliit Kangerlussuarmut apuuttussaassallutik.
Tamanna sioqqullugu arpannerminni sermersuarmi 3 kilometerinik isorartussusilik ilaatigut aqqutigissavaat.
Siorna marathonimi tuluttut "The Coolest Marathon"-imik taaneqartumi, Spaniamiu Francisko Sanches Pintor ajugaavoq, atorlugit 3 tiimit 14 minutsit 5 sekuntillu. Arnanilu ajugaalluni qallunaaq Marianne Delcomyn, atorlugit 3 tiimit 40 minutsillu.
Aqqusernit aputitallit arpattut aqqutigisaraluarpaat, ukiormannali taama pisoqarnavianngilaq.
- Ukiaq manna issaasannerata kinguneranik nittaalaqanngingajakkami, taamaattumik arpattut aqqutissaat sioqqat aputitaqanngillat, Jørgen Larsen aaqqissuisut ilaat Sermitsiaq.ag-mut oqarpoq.
