Kangerlussuaq qitiujuaannassanersoq Inatsisartunit isummerfigineqassaaq

Naalakkersuisut angallannikkut politikkeqarnersut kiisalu Kangerlussuarmut tunngatillugu qanoq eqqarsaateqartoqarnersoq Demokraatit Naalakkersuisunut apeqquteqaatigeqqammerpaat. Attaveqaqatigiinnermut naalakkersuisoq Kim Kielsen tamatumunnga akissuteqarluni oqarpoq, angallannikkut pissutsit Inatsisartunit ukiaru oqaluuserineqassasut, ilaatigut mittarfeqarfiit sorliit inerisarneqassanersut isummerfigineqassalluni.

Kangerlussuarmi nunaqarfimmi aqutsisut siulittaasuat Fritz Baumann ulloqeqqanut Radioaviiseqarnitsinni oqarpoq, Kangerlussuaq inoqarluartillugu tattorliuunnermik kinguneqartartoq pissutsillu maannangaaq iluarsiivigineqartariaqalersut – tikittartut amerliartuinnarnerat aamma eqqarsaatigalugu.

- Angallattut Kangerlussuarmi unnuisussanngortut inissaqartinniarnerat sulissutigineqarsinnaavoq, tamannali Inatsisartut ukiaru isummerfigisassaannut ilaaginnarpoq. Aamma Ilulissat Nuuk ilaatigut oqaluuserineqartussanut ilaapput. Kim Kielsen akissuteqarluni taama oqarpoq.

- Kangerlussuaq piujuaannassava imaluunnit Dash 7-init Nuumminngaannit Ilulissaninngaanniillu taamaallaat aqqusaarneqartalissava? Inatsisartut apeqqutit taama ittut naliliiffigisussaassavaat. Kim Kielsen nassuiaavoq.

- Kangerlussuaq Narsarsuarlu massakkut qitiupput, siunissami Ilulissat aamma Nuuk qitiusunngussanersut maanna misissorneqarpoq. Qitiusumik mittarfeqarfiit allanngortinneqassappata, assersuutigalugu Kangerlussuaq soorunami annikillisaavigineqassaaq. Kisianni tassa tamakkununnga tunngasut Inatsisartunit isummerfigineqassapput, Inatsisartut Naalakkersuisunit kisitsisinik saqqummiussivigissavavut, isumaqarpungalu Inatsisartut aalajangiiffigisariaqaleraat qanoq ingerlariaqqissanerluta. Kim Kielsen oqarpoq.