Kangerlussuaq aamma affaannanngortinneqarsinnaavoq
Assartuineq pillugu isumalioqatigiisitat inassutigaat Kangerlussuaq matuneqassasoq mittarfillu Nuummut nuullugu. Qeqqata Kommunia tamatumunnga akerliuvoq. Siunnersortit ilassutitut nalunaarusiaanni aamma erserpoq timmisartorsuarnut mittarfik matuneqarpat Kangerlussuaq ingerlaannarnissaminut aamma periarfissaqartoq.
Timmisartorsuarnut maanna mittarfiusoq 2.800 meteriusoq 1.050 meteriinnaanngortinneqarsinnaavoq suluusalinnit miffigineqarsinnaalluni. Taamali pisoqassappat nunaqarfik suliffissanik annaasaqassaasaq timmisartorsuarnut mittarfeqarneq sulisunik amerlasuunik pisariaqartitsimmat. Kangerlussuaq nunaqarfittut ingerlaannassappat inuiaqatigiit sipaarutissaat ikilissasut siunnersortit aamma oqaatigaat.
Siunnersortit COWI Ineqarnermut, Attaveqarnermut Angallannermullu Aqutsisoqarfik sullillugu ilassutaasumik nalunaarusiorsimavoq. Siunnersortit eqqoriarpaat timmisartorsuarnut mittarfeqanngitsumik nunaqarfik ingerlaannassappat innuttaasut maanna 550-sut 250-inut ikilissasut.
- Sipaarutissat 50 procentimik ikilissapput, nunaqarfik angallatunit tusintilikkaanit aqqusaarneqarunnaaraluarluni suli pilersorneqarnissamik pisariaqartitsissammat, taakkulu aalajangersimasunik akuttussusilimmik apuunneqartartussaapput, COWI-meersut ilassutitut nalunaarusiaminni allapput.
Taaneqareersutut Kangerlussuarmi suliffissat ikileriangaatsiassapput timmisartorsuarnut mittarfik matuneqarpat. Nunaqarfilli suli takornariaqarfittut periarfissaqarpoq. Nunaqarfiup kangiani umimmaqarpoq, tuttoqarpoq sermersuaqarlunilu uukkartartumik taakkulu saniatigut aasami naasorpassuaqartarpoq.
Kangerlussuarmi takornariaqarnermi toqqaannartumik Danmarkimut timmisartuussisarneq iluaqutigineqarsimavoq, tamannalu pissutigalugu nunaqarfimmut tassunga oqallisaasumut angalaniarneq unamminartumik akeqarsimavoq.
- Tamatuma iluaqutaanera Kangerlussuup annaassavaa ilimagisariaqarporlu takornariat ikilingaatsiarnissaat. Timmisartorsuarnut mittarfeqarnerup iluaqutissartai Nuummut nuussapput tassani takornariat amerlinissaat ilimagisariaqassammat, COWI-meersut allapput, ilimasuutigaallu Danmarkimiit Kangerlussuarmut angalaneq 2.500 koruuninik akitsussasoq.
Siunnersortit misissuinerisa takutippaat Kangerlussuaq nunaqarfittut ingerlatiinnarlugu mittarfik Nuummut nuunneqassappat inuiaqatigiit sipaarutissaat 460 millioner koruuninik ikilissasut.
Misissueqqissaarnerit maanna suli ingerlapput Nuup timmisartorfigineqarsinnaanera nalilersorneqarmat. Tamatuma kingorna aatsaat politikkikkut aalajangiiffigineqassaaq Kangerlussuaq matuneqassanersoq.
