Kangaatsiaq peqatigiumajunnaarpaat

Maniitsup Sisimiup kiisalu Kangaatsiap kommunii suleqatigiinnissamik siusinnerusukkut atsioqatigiipput. Maniitsup Sisimiullu borgmesterii kattunniarlutik ippassaq atsioqatigiipput, Kangaatsiarli ilaatinneqanngilaq.

Kommunit taakku marluk tunngavilersuutigaat, kommunerujussuanngussagunik ikinnerpaamik 8.000-inik innuttaqartariaqarlutik.

Kangaatsiap borgmesteria, Otto Jerimiassen, nakeriallassimalluni ima oqarpoq:

- Eqqumiigaara piffissami sivisuumi utaqqereersimallutigik imaaliinnarlutik nalunaarmata peqatigiumajunnaarluta. Utaqqinermut piffissaq sivisooq atorsimavarput siusinnerusukkulli taamatut isumaqarnerminnik kalerriisimasuuppata kommuninut allanut periarfiusinnaasunut uninngaannarnata ujartuisimassagaluarpugut, Otto Jerimiassen oqarpoq.

Aperaarput, kommunit kattussuunneqarnissaanut nammaqatigiinneq oqilisaassinerlu siunertaagaluartut, massakkut taamatut pissuseqartoqarnera qanoq nalilersinnaaneraa.

- Oqariartuutaat paasilluarsinnaavara, tassami sumiiffiit inissisimanerisa isorartunerat pimmassuk. Kisianni kattussuutsitsinermi siunertaasoq eqqarsaatigalugu, atortorissaarutit allallu aqqutigalugit ullumikkut suleqatigiinneq ajornaquteqarnavianngitsoq isumaqarfigigaluarparput, isorartussuseq apeqqutaatinnagu, Otto Jerimiassen oqarpoq.

Taanna erseqqissaavoq, taama aalajangertoqarnera pillugu assut pakatsisimallutik.

Taamatuttaaq erseqqissaavoq, allagarsiatik annikitsuinnarmik imaqarsimasut.

- Allakkat ima annikitsigisumik allanneqarput; isorartussuseq ullumikkullu Diskobugtimi suleqatigiinnerput tunngavigalugu isumaqarsimasut kommuninut taakkununnga kattutissagaluarutta,

Kangaatsiap borgmesteria, Otto Jerimiassen, oqarpoq.