Kangaatsiaq mittarfeqalerli
Avannaani Qeqertarsuarmi Qasigiannguani timmisartunut suluusalinnut mikinerusunut mittarfiliornissamik pilersaarusiornermut Kangaatsiap ilanngunneqarnissaa Inatsisartuni aalajangiiffigisassanngorlugu Siumut Inatsisartuni ilaasortaatitaanit siunnersuut Inatsisartut ullumi ataatsimiinnerminni oqaluuserineqartunut ilaavoq.
- Qeqertarsuarmi Qasigiannguanilu timmisartuaqqanut suluusalinnut mikinerusunik mittarfiliornissami Kangaatsiaq ilanngunneqarpat, taavani silaannakkut angallassineq ataqatigiinnerulissaaq, Kangaatsiamiit Kangaatsiamullu angalaniarneq aamma pisariinnerulissangaluarpoq, siunertaareersutullu qulimiguulimmik angallassineq siunissami taava annikillissigaluarpoq. Taama siunnersuuteqartoq Siumumeersoq Otto Jeremiassen, Kangaatsiami aamma borgmesteriusoq ullumi tunngavilersuuteqarpoq.
Kangaatsiap allallu illoqarfiit minnerusut mittarfittaarsinnaanissaat nunatsinnilu angallannerup siunissami qanoq isikkoqarnissaa pillugu suliakkiissutigineqartoq aappaagu Inatsisartut ukiukkut ataatsimiinneranni Naalakkersuisunit saqqummiunneqassaaq, tamannalu utaqqimaarusunneqarpoq.
Attaveqarnermut Naalakkersuisoq Jørgen Wæver Johansen akissuteqarluni oqarpoq Kangaatsiami mittarfiliornissanut atatillugu massakkut aalajangertoqarnissaanut taamaalilluni siusippallaartoq.
Kangaatsiami mittarfilioqqusinerup inuiaqatigiinnut aningaasatigut nammakkiisinnaanerata nalilersorluarneqaqqaartariaanera aamma erseqqissaassutigineqarpoq.
