Kangaatsiami qimmit aallaallugit nalusanit toqunneqartarput
Qimmit Sisimiunitulli Kangaatsiami nalusanit aamma toqunneqartarput. Qimmiutilik Sakarias Siegstad oqarpoq, nammineq siorna qimmit arfineq-pingasut aasaanerani qeqertamut inissitami ilai aallaaneqarlutik toqunneqarsimasut.
- Taama pisoqartarnera qimmiutilinnut pakatsinaqaaq. Nalusaratsigumi kina taamaaliortoq, Sakarias Siegstad oqarpoq.
- Ukiormanna qimmima 16-it ilaat ataaseq aallaaneqarluni toqunneqareerpoq, manna aarleqqutigaara allat aamma taama pineqaratarsinnaanerat. Qimmiutiliulluni toqqissisimananngilaq, Sakarias Siegstad oqarpoq.
Kangaatsiami qimmiutillit aasaanerani qeqertarpassuit eqqaminniittut arlaannut qimminik inissiisarnerat nangininngaavoq. Akuttunngitsumillu qimmitik aallaaneqarlutik toqunneqarsimasut qimmiutillit siumortarpaat.
- Qimmitta pitsaanersaat minnerpaamik ukiuni marlunni - assersuutigalugu sukkaniunnissamut - piareersakkat pissuteqanngitsumik toqunneqartarnerat nuanninngilaq, Sakarias Siegstad oqarpoq.
Qimmiutillit nalulluinnartarpaat kina qimminik toqoraasarnersoq.
- Immaqa sinngasoq, Sakarias Siegstad aamma oqarpoq ukiuni qulini nammineq qimmiutilittut taama pisoqartuarnera qatsulluinnarlugu, taamaattumik Kalaallit Nunaanni Qimussertartut Kattuffiata nersutillu nakorsaata akuliunnissaat kissaatigaa.