Kangaamiuni takornariaqarneq ineriartortinneqarsinnaavoq

- Kangaamiuni takornariaqarneq ineriartortinneqassappat takornarialernermik ilinniagaqarsimasut amigaataapput, takornarianik sullissisartoq, Regine Filemonsen oqarpoq. Tanna ukioq 2001-mi heliskimik takornarianik ilaatigut USA-mit, Canada-mit, Japan-imit Englandimiillu takkuttunik sullissisalerpoq. Kangaamiut eqqaa takornarianut periarfissaqarluartoq, Regine Filemonsen isumaqarpoq.

- Kangaamiut eqqaani periarfissaqarluarpoq, soorlu kangerlussuatsiami pinngortitaq angalaarfigalugu, sermersuaq ornillugu, qajartorneq, aalisariarneq, umimmannik tuttunillu piniariartitsisinnaaneq kiisalu pisuttuartitsineq, Regine Filemonsen oqarpoq.

Regine Filemonsen igasutut kiisalu takornarianik sullissisutut ilinniagaqarsimavoq, takornarianik sullissisarnermigut tuluttut oqallorinnerulersimavoq kiisalu takornarialerinermi piumasaqaatinut angummassinnaalersimalluni.

- Takornariat kalaaliminernik iggattarpakka, erininartarpoq igaakka qanoq isumaqarfigissaneraat takussallugit, naak ilaatigut ulapaarfinni qasunarsinnaasaraluartoq inuttut ineriartornaqaaq, Regine Filemonsen oqarpoq.

Regine Filemonsen takornarialerinerup saniatigut cafe-mik piginnittuuvoq Kangaamiunilu atuarfimmi aamma sulisarluni. Takornarialerineq kisiat maannamut inuussutissarsiutigisinnaanngikkallarpaa.

-heliskimik takornariat kisiisa eqqarsaatigissagutsigit, taava ukiumut sapaatip akunneri arfineq pingasut heliski-mik takornariartoqarsinnaagaluarpat, sapaatip akunneri sisamaannaanngitsut, taava kisiat immaqa inuuniutigineqalersinnaassagaluarpoq, Regine Filemonsen oqarpoq. takornarialerinerlu inuussutissarsiornermi maannamut tapertaalluartutut isigaa.