Kangaamiuni qatserisartut suliumajunnaarniarput
Taama sioorasaarereersullu, Qeqqata Kommuniata suliniuteqapallappoq, aningaasaqarnermullu ataatsimiititaliaa, qatserisartunut immikkut aningaasaliinissamik aalajangiipput.
- Kangaamiuni qatserisartut soorunami nunaqarfimmut naleqquttunik atortoqassapput, taamaattumik aningaasaliinissammik ataatsimiititaliaq aalajangerpoq, Hermann Berthelsen KNR-mut oqarpoq.
Kangaamiuni qatserisartut oktobarip 23-anni siullermik kommunimut allagaqarnerminni eqqaavaat, atortutigut atugassarititaasut pillugit kommunip sillimaniarnermut immikkoortortaqarfianut allagaqartarnertik akineqarneq ajornertik tamanna erloqinartuusoq.
Tassalu tamassuma kingorna Kangaamiuni qatserisartut aalajangeraluarput, januaarip aallaqqaataaniit suliumajunnaarniarlutik atsiornernillu katerssatik kommunimut nassiullugit.
Kangaamiuni qatserisartut ittuat, Arne Martinsen KNR-imut ullaaq oqarpoq, atortussaminnik takussaasumik pereerpat suliumajunnaarnertik aattaat unitsissallugu.
