Kangaamiormiut: Nunaqarfinni suliffissanik pilersitsisoqarli
Kangaamiuni peroriartortoq Anna Karen Thomassen, Kukamik taaguuteqartoq 28-nik ukioqarpoq, aappanilu Nuummi najugaqarput meerartaarnikuugamillu sulinngiffeqarallarluni, Kangaamiuni najugaqarunnaarnerminut tunngaveqarpoq.
- Annerusumik ilinniarsimasannik suliffissaqannginneq, taavalu atugassarititat, soorlu nioqqutissat akii, meeraqalernikuulluni meeqqanut atisat akii kiisalu ulluinnarni inuuniarnermi nerisassat akii qaffasippallaarput. Aamma illut najugassaritinneqartut ullutsinnut tulluarsorinnginnakkit, Kuka oqarpoq.
Politikerit nunaqarfiit pillugit isummersuleraagata, soorlu nunaqarfiit matuneqarnissaat, Kuka kissaammertarpoq, isumaqarporlu qineqqusaartut suliffissanik pilersitsinissaq samminerusariaqaraat.
- Nunaqarfimmiorpassuit ilinniarsimasut nunaqarfimminni suliffissaqannginnamik illoqarfimmut nuuttarput, Kuka oqarpoq.
Kangaamiormiu Antoinette Olsen, Nettamik taaguutilik 51-inik ukioqarpoq uinilu Svend pingasunik qitornaqarput. Qitornai tamarmik maanna Kangaamiuniinngillat. Nettap Kangaamiut siunissaat eqqarsaatigisarpaa, qularisarpaalu qitornarmi uteqqinnissaat.
- Tassami meeqqagut ilinniagaqartut allallumi maanga uteqqikkusuttaraluartut malunnartarput, kisianni suliffissaqannginnertik pissutigalugu allamut nuuttariaqartarput, naak ilaatigut nunaqarfitsinni suleqataarusuttaraluarlutik, Netta Olsen oqarpoq.
Inuttussuseq pillugu Kalaallit Nunaanni naatsorsueqqissaartarfimmi 2008-mi naatsorsuisoqarmat, Kalaallit Nunaanni nunaqarfiit 313-inik 2008-mi inukinnerulertut paasineqarpoq.
