Kalistat Lundip Tasiilaliarnissani borgmesterimillu ataatsimeeqateqarnissani ulluligaanngitsumik kinguartikkaa

Politikerit kikkut Tasiilamukassappat aamma qaqugu?

Nunalerinermut, imminut pilersornermut, nukissiuutinut avatangiisinullu naalakkersuisup, Kalistat Lundip piterarneranit aserorterneqartut suuneri alakkarlugit tunumukarniarnini ataasinngornermi KNR-imut nalunaarutigimmagu paatsuungasoqangaatsiarpoq.

Taassuma timmisartoq ilaaffissaa Kulusummi pujornera pissutigalugu taamaatiinnarneqarpoq. Taassuma Tasiilamukarnissamut periarfissat nutaat misissorai aamma Kommuneqarfik Sermersuumi borgmesteri, Avaaraq Olsen (IA) angalaqatigissagunaraa tusagassiuutinut nalunaarutigineqarpoq.

Nalunaarulli taanna pingasunngornermi allatut nipeqalerpoq. Kalistat Lundip angalanissani ulluligaanngitsumik kinguartinneqartoq KNR-imut oqaatigaa.

- Tunumut angalanissaq piffissamut allamut kinguartippara, qaammatisiutit misissulerpakka.

- Piffissami allami ulluiliissaanga neriuppunga ungasippallaanngitsumi.

Taassuma angalanissani pingasunngorpat ualikkut angerlaqqittussaareeruni akilersinnaanngissoraa.

Borgmesteri ilaassava naamiluunniit?

Borgmesterip Avaaraq Olsenip Tasiilamut angalaniarnani marlunngornermi oqaatigaa, taassuma kommunimit atorfilittap pingaarnerusup tassa Kommuneqarfik Sermersuumi sanaartornermi pisortap, Rudi Birkedalip Tasiilamukartinneqarnissaa pingaarnerusoraa.

Borgmesterip angalanissamut inissaqannginnini tunngavilersuutigaa.

Taamaattumik Avaaraq Olsenip Tasiilamut angalaqataanissaanik periarfissamik Kalistat Lundip tusagassiuutinut nalunaaruteqarnera ilisimaneqanngitsuuvoq.

Tamannalu pilersaarutaagunanngitsoq paasinarsivoq.

Politikerit taakku marluk Rudi Birkedalip Tasiilamit nalunaarutai oqallisiginiarlugit pingasunngornermi ualikkut ataatsimiittussaagaluarput, ataatsimiinnissarli taamaatiinnarneqarpoq.

- Teknikerip (Rudi Birkedalip aaqq.) silap ajornera pissutigalugu ippassaq aallarsimannginnera ullaap tungaani paasivara. Taamaammat tunumiit nutaanik paasissutissaateqanngilagut, taamaammat borgmesterilu ataatsimiinnissatsinnik piffissamut allamut kinguartitsiniarluta isumaqatigiippugut, Kalistat Lund KNR-imut pingasunngornermi oqarpoq.

Taassuma borgmesteri Tasiilamut angalaqataaginnarniarnerminik pilersaaruteqarnersoq oqaaseqarfigerusunngilaa.

- Tamanna susassaqarfiginngilara. Neriorsuuteqarnermisut kommunimit aallartitaqarniartut tusarpara.

- Tamanna pillugu oqaaseqarnissara siunertarinngilara, pissutigalugu kommunip aallartikkusutani aallartissavai uagut aamma taamaaliussaagut. Taakku marluk imminnut attuumassuteqanngillat, Kalistat Lund oqarpoq.

KNR-ip Avaaraq Olsen pingasunngornermi oqaaseqartinniarsarigaluarpaa, taannali kommunip attaveqaqatigiinnermut immikkoortortaqarfia naapertorlugu ulloq naallugu ulapippoq.