Kalaallit World Pridemi peqataasut: Nunatsinni LGBT+ pillugit saqqumilaartut amigaataapput

Meerartaareernermi sulinngiffeqarnissamut pisinnaatitaaffiit amigartut, inuiaqatigiinnilu suiaassutsip assigiinngisitaarsinnaaneranik ilisimasakissuseq. Tamakkuupput inuit LGBT-mik tunuliaqutallit nunatsinni naammattoortagaat ulluinnarnilu ilungersuutigisartagaat.

Kalaallit LGBT+-mit aallartitaat ataqatigiisaarisoq, Tone Frank, taama oqarpoq, taanna sapaatip akunnerani Københavnimi World Pridemi peqataasussaavoq. Taanna inuit suiaaqqatigisaminnik, angutinik arnanillu atoqateqartartunik suiaassutsimi akerlianik kinaasusillillu pillugit nunarsuaq tamakkerlugu pisinnaatitaaffiinnik siunertaqarluni nalliuttorsiuttorsiorneruvoq.

Inuit LGBT+-mik tunuliaqutallit Kalallit Nunaanni naligiinnermik misigisimalernissaanut unammilligassat suli amerlasut taasumap taakkartorpai.

- Kalaallit Nunaanni takussaanerat amigaataasoq isumaqarpunga. Pissutsit eqqartorneqarneq ajorput. Inuiaqatigiit akornanni suiaaqqatiginngisamik atoqateqartartut initupput, inuiaqatigiinnilu akuerineqarsimanngikkaani malugineqarnanilu, sumut ilaatinneqarnermut imminerlu naleqartinnermut sunniuteqartarpoq, Tone Frank oqarpoq.

LGBT ima isumaqarpoq Lesbian (arnaqatiminoortoq), Gay (anguteqatiminoortoq), Bisexual (arnanik angutinillu ilaqartartoq) aamma Transgender (suiaassutsimi akerlianik kinaasusilik). Kalaallit Nunaannilu LGBT+-mut tunngasunik ilisimasaqarnerat amigartoq,Tone Frank, isumaqarpoq. 

- Suiaqatigiinnermut tunngasunik ileqqutoqqat nungusarneqartariaqarput, inuit LGBT+-mik tunuliaqutallit ersarsissarneqarnerusinnaapput. Tapersersuisoqarlunilu ataqatigiittoqartariaqarpoq. Ima oqarneq naammanngilaq: "Inuit LGBT+-mik tunuliaqutallit tapersersorpakka." Timitaliisoqartariaqarpoq, ajoqersuillunilu ilikkagassarpassuaqarpoq. Aningaasaliisoqartariaqarpoq inuillu LGBT+-mik tunuliaqutallit aqutsisuunissaanut kaammattuisoqarnerulluni, taanna oqarpoq. 

Ilaatigut kulturikkut suliniuteqartut, Kalaallit Nunaanni inuit LGBT+-mik tunuliaqutaqartut ersarunnerunissaanut assigiinngissutsimillu pilersitsinissamik suliniuteqartumik, taanna nassuiaavoq.

Danmarkimi pisinnaatitaaffiit assiginngikkai

Københavnimi World Pridetoqarnissaanut atatillugu, Kalaallit Nunaanni inuit LGBT+-mik tunuliaqutallit atugassarititai pillugit, Folketingimi Kalaallit Nunaannut tunngasunut ataatsimiititaliaq pingasunngormat ataatsimeeqqatigaa.

Kalaallit Nunaanni inuit LGBT+-mik tunuliaqutallit allat, peqatigiiffillu Nalik siulittaasuuffigisani, peqatigalugit taamaaliorpoq. Atugassarititaasunut politikerit aaqqiissuteqarfigisinnaasaanik arlaqartunik siunnersuuteqarpoq.

Ilaatigut erninermi sulinngiffeqartarnermut tunngatillugu.

- Kalaallit Nunaanni arnat marluk meerartaarnermini anaanaqataasoq erninermi sulinngiffeqarnissaa inatsisitigut periarfissaqanngilaq. Piginnaatitaaffik tamanna Danmarkimi atuuppoq, Tone Frank oqarpoq.

Ataatsimiinermi Aaja Chemnitz Larsen peqataavoq. Taanna Folketingimi Kalaallit Nunaannut tunngasunut ataatsimiititaliami IA sinnerlugu siulittaasuuvoq.

Inuit LGBT-mik tunuliaqutallit naligiinermut pisinnaatitaaffinnullu tunngasut eqquutissappata, erninermi sulinngiffeqartarnermut tunngasut allanngortittariaqartut politikkerip isumaqarpoq.

- Suiaaqqatigiillutik meerartaarusukkunik, erninermut tunngatillugu sulinngiffeqarnissamik marluullutik pisinnaatitaaffeqarnissaat pingaaruteqarpoq. Ullumikkut pissutsit imaapput angajoqqaaviit aappaa kisimi erninermut atatillugu sulinngiffeqaqqusaavoq. Taakkuupput meeqqanut inatsit tunngavigalugit, erninermut atatillugu sulinngiffeqarnissamut inatsisinik allannguuteqarfigisinnaasarput, inatsisinik eqqartornerqartuni siuliatigut isornartorsiuereersimasoq, Aaja Chemnitz Larsen oqarpoq.

Inatsisit ersarittariaqartut

Erninermut atatillugu sulinngiffeqarnermi naligiissitaanerunissamut pissutsit kisimi aaqqitassaanngitsut, Tone Frank isumaqarpoq.

Qinngarinniinarluni pinerluffigitittarnermut eqqugaasoqassagaluarpat inatsisikkut inuit LBGT+-mik tunuliaqutallit illersorneqarnerusariaqarput. Taamaattumik Danmarkimi inatsisinik allannguinissamik siunnersuutigineqartoq atuutilissappat Kalaallit Nunaanni aamma atuutilissasoq taasumap neriuutigaa.

Aaja Chemnitz Larsenip tamanna isumaqataaffigaa:

- Inatsisit ajunngitsumik atorneqarnissaanut, ullutsinni naleqquttuunissaat, politikkikkullu eqquutinneqarnissaat iliuuseqarfigisinnaavagut. Tigussaasumik qinngarinnilluni pinerlunniartarnerit inerteqqutinngornissaanut qulakkeerinnissinnaavugut, pinerlunnernut taamaattunut akuersaannginnerput inatsisinilu ersarissarneralugit sukateriffigisinnaavagut, Aaja Chemnitz oqarpoq.

World Pride Københavnimi Malmømilu ingerlanneqarpoq, aggustip aqqaneq aappaanniit sapaat aggustip 22-iata tungaanut ingerlanneqarpoq.