Kalaallit Tysklandimi nuannersumik misigitinneqarput

Kalaallit angutit assammik arsartartut VM-ernermi Tunesiamut siorna nunarsuarmi pissartanngorniunnermi nr. 4-sunut ullumi unamminerat kalaallit ajorsarnerannik kinguneqarpoq. Taamaakkaluartoq unammiat nuannersorsuarmik misigisut, Kalaallit Nunaanni assammik arsarnermi sungiusaasoq Jacob Andreassen oqarpoq.

-Aallartinnata nalugaluarparput suut misigissanerlugit, maannali marloriarluta unammereerluta nalissaqanngitsunik misigisaqarsimalluta oqaatigisinnaalerparput.

Assut takutitsilluarsimavugut unammillersinnaassuseqarnerpullu nittarsaalluarsimallutigu. Allaammi ajorsaraluaraangattaluunniit isiginnaartunit ersaattaanneqartangaaratta qangataannangajalluta aniartortarpugut. Ilumut misigisaq naliitsuuvoq, Jacob Andreassen unnersiorpoq.

Tunesiamiut, kalaallit arsarluaraluaqisut, 36–20-mik ullumi ajugaapput, nikinnermi 17-4-qqasimallutik.

Nikinnermi qanormita oqaluussimappat, sungiusaasoq aperaarput.

- Ila sorpassuit oqaluuseraagut. Unammisagut Tunesiamiut nunarsuarmi assammik arsallammattut toqqakkamik ilallit assorujussuaq sukalanerat, pingaartumillu målmanderinnerat kalaallit iserteriagaasa arlalissuit iluatsinnginnerannut pissutaavoq. Kalaallit måleriaraluaraangata qangaammalli ullumi unamminermi arsallammattut toqqarneqartup annaatereeraraa. Kisianni kalaallit ilumut akiuulluavipput, nangippoq.

Jakob Larsen kalaallini isertitsinersaalluni arfineq-pingasunik målerpoq.

Kalaallit Kuwaitimut unamminerat KNR TV-kkut radiukkullu toqqaannartumik aqagu nalunaaqutaq marlunut aallakaatinneqassaaq.

Sungiusaasup assut eqqoriaruminaatsippaa qanoq kalaallit assammik arsartartui angusaqassanersut, Kuwaiti arsallammassuarnik arlalinnik aamma ilaqarmat. Unnuaq naallugu akeqqatta arsariaaasiat oqaluuseralugulu aqagu qanoq qinngasaarsinnaanerlugit piareersassavarput, Jacob Andreassen naggasiivoq.