Kalaallit Tromsømi peqatigiiffiliorput

- Naapeqatigiittassaagut, Kalaallit Nunaannilu pisut oqallisigisassallugit, norgemiunut nittarsaassissalluta, kalaallinullu tikittunut, soorlu ilinniariartortunut, najugaqarniarnermut allanullu maanimiuunermut tunngasunik paasissutissiisassalluta, taama oqarpoq Dina B. Nielsen, peqatigiiffimmik pilersitseqataasut ilaat.

Tamannalumi Aaju Simonsenimit ukiup aappaa qeqqa Tromsøp Universitetiani ujarassiuunngorniartumit taperserneqarpoq.

- Maani uumassusilerituutut, ujarassiuutut aalisarnermullu ilisimasalittut ilinniarnissaq piukkunnartorujussuuvoq, tassami Tromsø Kalaallit Nunaanut eqqaanartorujussuummat, apisarlunilu, qiianarsinnaallunilu ukiukkut sisorartoqarsinnaammat.

Peqatigiiffiup anguniagassaa siulleq tassaavoq Karasjok-imut Norge-p avannarpiaanut angalaarnissaq. Tassani Sametinge pulaarneqassaaq soorlu aamma Same-t tuttuutillit pulaarneqassasut.

-Eqqartorparput aamma erinarsoqatigiinnik pilersitsiniarluta, taamaalillutami kalaallit erinarsuutaannik tussiutaannillu erinarsoqatigiittarlutalu tussiaqatigiittarsinnassaagut, Dina B. Nielsen naggasiivoq.