Kalaallit Tivolimiinnissaat qulakkeerneqarpoq
Sapaammi juulip 31-ianni nipilersoqatigiit Aarhuusimeersut Qaqortormiuinnarnik inuttaqartut, imminnullu taasimasut Small Time Giants, tassaasut: Anda Hendriksen, Jakob Skovaa, Miki Jensen, Jonas Lundsgaard Nilsson aamma Pilunnguaq Hammeken nipilersussapput.
Malu Fleischer nipilersoqatigisartakkanilu nammineq taalliaminik atuiniartoq, pilersaarutini takoqqinneqarsinnaasut ilagissavaat.
Minnerunngitsumillu aaqqissuisut ilisarititassaasa ilagaat tumerparpaallammak Jens Nielsen. Taanna aterusini trommelumsen atorluarlugu tumerparpaallaqqinnersuani takutissavaa.
Saniatigut atit pingaarutillit marluk, inissinnivinnisssaat piariingajalerput. Aaqqissuisulli maannamut atsioqatigiittoqarsimannginnera pissutigalugu, avammut nalunaarutigerusunngikkallarpaat.
Aningaasaateqarfinnut qinnuteqaatit ajalusoormatali, aggustip aallaqqaataasiornissamut aningaasaatigineqartut ukioq manna killeqarluinnarput. Qinnuteqarfigineqartuni Nuna Fonden itigartitsisimavoq, Namminersorlutillu Oqartussat kulturimut aningaasaateqarfiat qinnuteqaammik tigusaqarsimannginnerarpoq - naak aaqqissuisut qinnuteqaat allakkatigut nassiussimagaluaraat. Taamaattumik ukioq manna Tivolimiit 300.000 koruunit tapiissutaasimasut kisimik atugassiissutissaasut nalunaarutigaat. Siorna aaqqissuussinermi 500.000 koruunit missingersuutiginearput.
Tamatumalu kingunerisaanik pilersaarut allanngortinneqartariaqarsimasoq, aaqqissuussinerillu pilersaarusiornissaat nukissanik atuiffiungaatsiarsimasut ukioq manna Kallallit Tivolimiinnissaannut aqqissuisuni siulittaasup Sidsel Møllerip oqaatigaa, ilaatigullu qaannamik kinngusaqattaarnerit peerneqartariaqarsimallutik.
- Isumaqarpunga pilersaarusiaq pitsaasumik iluatsittoq, taamaattorli pissutsit nalaatsornerinnakkut takkuttut, piffissarlu kingulleq atorlugu ulapinnikkut aaqqissimavavut. Nuanneqaarli naggataagut iluatsimmat, Sidsel Møller taama oqarpoq.
Kalaallit Tivolimi siulersuiniit neriuutigineqarpoq aningaasaliissutaasartut aaqqissuussinissaq ukiumik ataatsimik sioqqutsisumik tiguneqartassasut, taamaasillunilu aaqqissuussisarneq piffissaagallartillugu ingerlanneqarsinnaaniassammat.