Kalaallit Tivolimi nuannatilersut
Tusarnaartitsinerit assigiinngitsut pilersaarutigineqarput, nipilersortartut nunatsinneersut assigiinngitsut tusarnaartitsissallutik, soorlu aamma kalaallit ilusilersugaat, sanalukkat atuakkiallu nutaat takuneqarsinnaassasut.
Kalaallit Nunaanneersunik aamma sassaalliisoqarumaarpoq, imeq Sermersuarmeersoq, raajallu qalaassat sassaalliissutigineqassallutik.
Aaqqissuisut ilimagaat inuit 15.000-it pallillugit Tivoliliarumaartut. Plænenimi tusarnaartitsisussanut ilaasut tassaapput Nina, hip-hopertartullu Nuuk Posse kiisalu Enok Poulsen.
41-ssaa Kalaallit Nunaat Tivolimi aaqqissuunneqarpoq. Inuit Nunatsinneersut 25-t Tivolimi naapeqatigiittarnerannik aallartissimariarluni, taama naapeqatigiittarneq annertusiartuinnarsimavoq, nunarpullu pillugu kulturikkut pikialaartitsinerit annerit ilaannut maanna ilaalersimalluni.