Kalaallit Tivolimi naapittut silagissioqaat

Kalaallit Nunaat Tivolimi ulluni makkunani ingerlanneqarpoq, silaginneralu eqqorluarneqaqaaq. Unnuakkuinnaq siallertarpoq ullukkut seqinnarilluni kiattaqaluni, inuillu 45.000-it ullut marluk siulliit takusaasimasut, Tivolimi paasissutissiisarfik ilisimatitsivoq.

Siorna taamatut aaqqissuussisoqarmat takusaasut peqataasullu ulluni pingasuni 74.000-iusimapput. Ullumikkut aggustip ulluisa aallaqqaataat tassaavoq kalaallit Tivolimi ulluannik taaneqartartoq, tassaasarporlu aaqqissuussinermi inoqarfiunerapaasartoq, pingaartumik kalaalerpassuit naapittarput. Ullumikkut nipilersortoqarnissaani tamanna aamma malunnarpoq, nipilersortussani ilisarnarnerpaagunarlutik qilanaarineqarnerpaagunarlutillu Zikaza, Siiva Fleischer erinarsortoralugu.

Zikazakkut unnugu nipilersortartuni sakkortunerpaassagunarput. Siullermik erinarsoqatigiit N.I.P.E. erinarsussapput, taava ileqqorsortartoq Povl Dissing erninilu kingorna appisimaassallutik.

Rappertartoq Lucas Nina aamma Malik peqatigalugit taavalu 2nd Street-ikkut Ilannguaq Lumholdtilu ualeru aliikkusersuisussaapput.

Tivolimi Plænenimut tusarnaariat sialussiornatik nuannisassanersut maanna apeqqutaalerpoq, unnugumiimmi siallilertarnissaa silasiorfiup DMI-p ilimasaarutigaa. Taamaakkaluaraangalli Tivolimi naapisimaartunut nikallorsaataanngilluaasartarpoq.