Kalaallit Taekwon Do-rtartut ujaminnaqqipput

Kalaallit Taekwon Do-rtartut Europami pissartanngorniunnerni frikampimi angusarissaarput. Tassani Sten Rasmussen bronzennappoq.

Taamatuttaaq angusaqarpoq Pilunnguaq Filemonsen arnat frikamperneranni bronzennattoq. Taamaasilluni kalaallit arnartaanni siullersaalluni nunat tamalaat unamineranni ujaminnappoq. Taassuma semifinalemi ajorsarfigaa Europami pissartaq Nedialka Bacheva Bulgariameersoq.

Europami pissartanngorniunnerni unammisartut 426it peqataapput nunanit assigiinngitsunit 26neersut.

Kalaallit aamma unammeqataaffigaat powerbreaking aamma iligiiaarluni tul taakkunanili ujaminnanngillat. Tassanilu paasivaat ujaminnassagaanni sivisuumik piareersarnissaq pisariaqartoq.

- Tamanna ilaatigut anguneqarsinnaavoq Europap kangianut Kangianulluunniit (Asia) sungiusariarnikkut nunanut allanut toqqaannartumik nallersuussinnaajumalluni, taama nalunaarpoq nuna tamakkerlugu sungiusaasoq Lauritz Heilmann.

Kalaallit nunanut allanut unammisartut marloriaannarlutik ukiortaap kingorna Nuummi sungiusaqatigiipput Europami Tallinimi pissartanngorniunnissaq sioqqullugu.