Kalaallit suliffeqarfiutaat nitritimik akoorisimasutut paasineqarpoq
Suliffeqarfik Polar Salmon nalunaaqutsersuisarneq pillugu nalunaarut unioqqutillugu nitritimik akuutissanillu allanik marlunnik atuisarsimavoq. Kapisillit qalipaataat aappallorissitinniarlugu nitrit atorneqartarpoq.
Taamattumik Inuussutissaqarnermut aqutsisoqarfiup Polar Salmon politiinut tunniussimavaa, 80.000 koruuninillu akiligassillugu.
Aamma suliffeqarfik alla, Vega Salmon, qallunaanit pigineqartoq, kapisilinnik 280 tonsiusunik akoorisimasutut 1 million koruunimik akiligassinneqarpoq.
Kapisillit akusat amerlanerpaat Australiamut tunineqarsimapput, Polar Salmonimiillu neriorsuutigineqarpoq, Europamut tunisisoqarsimanngitsoq.
Suliffeqarfiup pisortaata KNR-mut nassuerutigaa, kapisilinnik akoorisimallutik, utoqqatsissutigalugulu Australiamut tuniseqqusaannginneq ilisimannginnerarlugu.
- Inerteqqutaanersoq paasiniaalluarsimanngilarput, eqqumalluarfigisimanagulu. Isumaqaavissimagaluarpugut akulinnik tunisisinnaalluta, Jan Weinrich oqarpoq.
Inuussutissaqarnermut aqutsisoqarfiup utoqqatsissut tigulluanngilaa:
- Suliffeqarfissuit taama angitigisut, aalisakkanik akulinnik Australiamut tuniseqqusaannginnermik ilisimasaqannginnerat tupigeqaara, Inuussutissaqarnermut aqutsisoqarfimmi Uumasut Nakorsaat Henriette Mynster Ritzauimut taama oqarpoq.