Kalaallit suliffeqarfii Kina-mi niueqatissarsinngillat
- Siunissami qallunaat kirsebærinik viinniliaanik, Carlsbergimi immiugaannik, qallunaat puulukiutaasa pamiuinik, qallunaat kiassaatiliaanik, qallunaat anorisaatiliaanik Kinamiut atuisunngussapput, asulu qallunaat umiarsuaataanik, tassa Mærskip umiarsuaataanik tamakkorpassuit assartorneqartassallutik. Tassa tamakkuupput qallunaat Kinamiunut isumaqatigiissuterpassui atsiorneqarnissamik utaqqiinnartut ilaat.
Isumaqatigiissusiarpassuit 18 milliardtit koruuninik naleqarnissaat naatsorsuutigineqarpoq.
Kalaallilli suliffeqarfiutaat ataasinnguarluunniit isumaqatigiissusiorfigineqanngilaq. Taama Avammut tunisassiornermut siunnersuisuneersoq Vibeke Rovsing Lauritzen KNR-imut oqaluttuarpoq.
Nunattali ammeriviani pisortaq, Lars Berg tamakku aporfiginagit Kinamiunut attaveqalereersimavoq.
- Uagut Nunatta Ammerivianiit suliniutivut nammineerluta ingerlappavut, aamma Danmarkip Nunanut allanut tunngasunut ministeriaqarfia, Niuernermut tunngasunut ministeriaqarfia, Issittup Aallartitaa suleqatigilluarivut oqaatigisinnaavara. Taamaasiornitsinnimi puisit amii pillugit Kinamiunut paasititsiniaanerput ingerlanniarsaralutigu. Tassa pisisartorilersinnaasavut nammineerluta attaveqarfigilereerpavut, taamatullu periuseqarnerput uagutsinnut angisuujuvoq, Lars Berg oqarpoq, aasallu ingerlanerani Kinamiut suleqatigisinnaasat assigiinngitsut naapissanerarpai, tassalu amminik tunisaqarnerulernermik kinguneqaratarsinnaalluarluni.
- Niuerfissaq nutaaq sivisuumik matoqqasimasoq iserfiginiarnera ilungersunartuuvoq. Tassa ullormiit ullormut niuerfissaqalernissaq pisinnaanngitsoq nalunngikkaluarparput, Kinamulli tunisisinnaanngornissarput ilungersuupparput, iluatsitsinissarpullu neriuutigalugu, Nunatta Ammeriviani Pisortaq Lars Berg taama naggasiivoq.
