Naak Danmarkimi efterskolinut qinnuteqartut aatsaat taama amerlatigigaluartut kalaallit inuusuttuarartatik aasaru efterskoleriartissinnaassavaat.
Efterskolit allaffeqarfianni siunnersortip Ole Borgå-p tamanna neriorsuutigaa.
- Oqaatigisinnaavara kalaallinut efterskolerusuttunut aasaru periarfissaqassammat. Efterskolit ilaat ulikkaaqqagaluarput, tamarmillu kissaatigisatik pisinnaanngilaat, taamaattorli aasaru inissaqartitsisoqassaaq.
- Taamaattorli ukiunut marlunnut utaqqisarnissamik tusatsiakkat ilumoortortaqarsinnaapput, tassami efterskolit ilaat aalajangersimasut taama utaqqisoqartigisinnaasarput. Kisianni 2007-imi aasakkut efterskolerniarluni qinnuteqarnissaq periarfissaqarpoq, taamaattorli qinnuteqajaarnissaq isumatusaarnerussaaq, Ole Borgå oqarpoq.
Kalaallit atuartut 200-nit amerlanerusut Danmarkimut ukiut tamaasa efterskoleriartarput. Qinnuteqarfissaq kingulleq tassaavoq decembarip ulluisa aallaqqaataat. Danmarkimi efterskolemiinneq aamma nuannarineqaleraluttuinnarpoq. Ukiumi atuarfiusumi tulliuttumi aatsaat taama amerlatigisunik efterskoliniittoqarnissaa naatsorsuutigineqarpoq, tassa atuartut 25.000-it missaanniittut efterskolerniarput.