Kalaallit siulittaasuussapput

Alloriarnerit marluk angisuut NAMMCO-p Islandimi sapaatip-akunnerani matumani ataatsimiinnerani anguniarneqartussatut aalajangiiffigineqarput. Aalisarnermut pinernermullu pisortaqarfimmi pisortaq Amalie Jessen oqarpoq, immikkut ittumik puisit pillugit ataatsimiititaliortoqartoq, Kalaallit Nunaata siulliulluni siulittaasuuffigiligassaanik.

-Sulianik tamatigoortunik oqaaseqassaguma aallarniutigalugu oqaatigissavara Nammcomi puisit pillugit aqutsisoqatigiinnik pilersitsisoqarami siusinnerusukkut puisit, arferit, qilalukkat, aarrit taavalu niisarnat, tassa miluumasut tamaasa ataatsimut komitéqartikkaluaramikkit, kisianni massakkut puisit immikkut komitéliuppaat tassanilu nunarput siulittaasuussaaq. Amalie Jessen oqarpoq.

Assersuutigaa Nammco-mut Canada ilaasortaanngitsoq, kisianni Kalaallit Nunaallu puisinik avitseqateqartartoq. Kalaallit Nunaata Canadallu imartaani kisitsinerit kingulliit takutippaat 5,9 millioninik aataaqartoq.

Aataat 5,9 millionit aalisagarpassuarnik saarullinnik, ammassannik allanillu nerisaqarput taamaattumillu nunat pineqartut aalisartortaannut unammillertuullutik. Ataatsimiititaliaalersussami eqqartorneqartussaq pingaartoq taamaattumik tassaavoq nerisaqaqatigiinneq.

- Soqutiginaatilerujussuaq pingaarutilillu, Amalie Jessen oqarpoq.

- Assersuutigalugu norskit sinerissaminni gråsælinik taasartagaat puisit nunatsinni piginngisagut taavalu qasigissat allallu pillugit Sverige Finlandilu peqatigalugit suleqatigiinnissaanik oqaaseqarput, taamaasilluni suliassanik aalajangersimasunik pusinut tunngasunik sammisaqarnerulissaaq suliniutaavoq. Taassuma saniatigut imarmiunik misissuinissamik programmi aallartinneqassaaq.

- Alloriarnerit angisuut aapparaat arferit Atlantikup avannaani annertuumik misissuiffigineqalernissaannik aalajangerneq. Aatsaavissuaq arferit suut sumilu nassaassaanerat sukumiisumik misissorneqassaaq, Europa-mit Amerikap avannaanut – Rusland Canadalu ilanngullugit, pilersaarusiorneq ingerlanneralu Nammcominngaanniit ataqatigiissaarneqarluni.

NAMMCO-p ataatsimeersuartitsinerani Kalaallit Nunaat kingumut uparuarneqarpoq, kitaani qilalukkat aarrillu pisarineqartartut amerlagalugit aarleqquteqarneq ersersinneqarluni.

- Uparuaatit soorunami angerlarutta nalilersussavagut aamma atorfillit akornanni. Allannguisoqassappallu tamanna politikerertatta sammiumaarpaat, Amalie Jessen naggasiivoq.