Kalaallit Savalimmiormiullu unammissapput
Kalaallit nunanut allanut assammik arsarlutik unammisartui Savalimmiormiullu unammisartui, januaarip ulluisa 21-anni Torshavnimi ikinngutigiittut unammissapput.
Allattoq Louise M. Kleemann
Nunanut allanut unammisartutoqqat ilaannai unammeqataassapput, unammisartut sinneri misiliattagaqarpianngitsut taamaaliornikkut periarfissinniarneqarput. Tamannalu Amerikap nunavittaani assammik arsarluni unammersuarnernut peqataanissamut iluaqutaassasoq, Kalaallit Nunaanni assammik arsartartut Kattuffiat nalunaarpoq.
Kalaallit Savalimmiormiullu arfinileriarlutik siornatigut naapereerput. Kalaallit ataasiaannarlutik ajugaanikuupput, pingasoriarluni naligiittoqarnikuuvoq Savalimmiormiullu marloriarlutik ajugaanikuullutik.