Kalaallit Røde Korsiat nutaanik suliniuteqarniarpoq

Kalaallit Røde Korsiat Nuummi sapaatip akunnerata naanerani ataatsimeersuarpoq. Ataatsimeersuarnermi Kalaallit Røde Korsiata siulittaasua Tove Blidorf siulittaasutut ingerlaqqippoq. Dansk Røde Korsimi pisortaq Anders Ladekarl ataatsimeersuarnermi aamma peqataavoq.

Kalaallit Røde Korsiat ukioq allortarlugu ataatsimeersuartarpoq.

Kalaallit Røde Korsianni siulittaasup tullia Anso Grødem, aperaarput Kalaallit Røde Korsiat Nunatsinni qassinik immikkoortortaqarnersoq.

- Illoqarfinni arfinilinni immikkoortortaqarpugut, tassa Qaqortumi, Nuummi, Maniitsumi, Sisimiuni, Ilulissani Qasigiannguanilu, Anso Grødem oqarpoq.

Ataatsimeersuarnermi suliniutissatut ilaatigut makku oqaluuserineqarput.

- Kalaallit Røde Korsiata qangalili suliniutissatut siunniunnikuuaa, aalajangersimasumik meeqqat inuusuttullu suliniarfiginissaat. Kisianni ukiuni kingullerni maluginiarparput, tamakkua peqatigiiffippassuarnit allanit suliniarfigineqartut. Taamaattumik suliniutivut allanngortilaarlugit ingerlanniarpavut. Ikiueqqaarnermut ilinniartitsineq annertunerusumik suliniutigissavarput, maannamut annikippallaartumik suliniuteqarfigigatsigu. Naak sineriammiuunerput pissutigalugu tamanna angisuumik pisariaqartittarlutigu.

Atornikuerniarfiit aamma aningaasanik isaatitsisuummata, peqatigiiffiillu ataasiakkaat suliniarnerminni aningaasat taakku atortussaammatigik iliuuseqarfiginiarpavut.

Taava aamma aningaasaateqarfinnik arlariinnik sillimmateqarpugut. Taamaalilluta arlaatigut ajunaarnersuaqassagaluarpat ikiuisinnaanissatsinnut piareersimaniassagatta. Massakkut aamma eqqarsaatigaarput nunanut allanut ikiuiniartarnitta saniatigut aamma Nunatsinni ikiuiniarsinnaanissatsinnut aningaasanik immikkoortitsisalernissaq aalluttariaqaripput, Anso Grødem taama naggasiivoq.

Kalaallit Røde Korsiat ikiuiniarluni aningaasanik katersuiniaraangat kalaallit qanoq ikiuukkumatutigisarnersut aamma aninngaasat katersorneqartut sumut atorneqartarnersut, aqagu ullaakkut radioaviisimi tusagaqarfigisinnaavasi.