Kalaallit Røde Korsiat nutaamik siulittaasortaarpoq

Kalaallit Røde Korsiata sinniisuutitai Nuummi ippassaq sapaammi ataatsimiimmata siulittaasumik nutaamik siulersuisunilu ilaasortanik qinersisoqarpoq. Nuna tamakkerlugu siulittaasunngorpoq Tove Blidorf Qaqortumeersoq.
Allattoq Louise M. Kleemann
oktobarip 20-at 2008 06:42

Siulersuisut nutaat siunissami suliniutissamittut eqqartugaasa ilagaat, sinerissami nutaanik immikkoortortaqarfiliornissaq ilaasortassarsiornissarlu.

Meeqqat inuusuttullu pillugit suliniuteqarnissaq, ikiueqqaarnermik pikkorissartitsinerit amerlisarnissaat, atornikuerniarnerup sinerissami sumiiffinni amerlanerni ingerlanneqalernissaa suliniutissanut ilaapput.

Siulittaasunngorlaaq Tove Blidorf innuttaasut Kalaallit Røde Korsianut ilaasortanngornissaannik kaammattuivoq, oqarluni Røde Kors nunatsinni nunarsuullu sinnerani ikiuiniaqatigiiffiummat soqutiginartoq.

Siulersuisuni ilaasortanngortut tassaapput siulittaasup tullia Parnûna Heilmann Olesen, Nuuk. Aningaaserisoq Otto Albrechtsen, Nuuk. Siulersuisuni ilaasortanngorput Kunuunnguaq Olsen, Maniitsoq aamma Mimi Karlsen, Maniitsoq. Sinniisussatut qinerneqarput Kirsten Nielsen, Qaqortoq aamma Rachel R. Jensen, Ilulissat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq