Kalaallit qallunaatsiaallu tusarnaartitsissutigilerpaat
Inuit Theatre Company Simon Løvstrømip Mooqqup ingeraltaa Ole Kristiansen suleqatigalugu Villads Villadsenip taalliaannik oqaluttuamik imalimmik 'Qasapip ullua kingulleq'-mik nutaanngorsaavoq. Suliarli siullermik pilersaarutaasutut annertutiginngilaq.
- Nipilersuutigaluni isiginnaartitsissutaanissaa pilersaarutaasimagaluarpoq. Aningaasaliisulli killeqarmata tamanna piviusunnginngilaq. Taarsiullugu inuusuttunut tusarnaartitsissutitut suliaraarput, Simon Løvstrøm, Mooqqu, oqarpoq.
Villads Villadsenip taalliamini oqaluttuaraa kalaallit qallunaatsiaallu akersuunnerat. Kalaallit pissartaata Qasapip Uunngortoq, taalliami Trolde-mi taagorneqartoq, ajugaaffigaa
Taallaq taanna atuakkiortuugaluup 1937-mi allataraa. Nammineerluni aamma akuersisimavoq ullutsinnut naleqquttunngorlugu suliareqqinnissaanut maannalu tassa inuusuttunut sammititamik tusarnaartitsisoqalerpoq.
- Ajoraluartumik inuusuttuaqqat naammattoortarpagut apersortut nipilersoqatigiit Piitsukkut ukiut 30-it matuma siorna sooq imatut erinarsorsimanersut: 'Inuiaat naqisimaneqartugut ataatsimut kattutta, Simon Løvstrøm, Mooqqu, oqarpoq.
- Namminersulivikkiartorpugut. Taamaattumik isumaqarpugut ukiut ingerlaneranni aporaattarsimanerit inuusuttunit ilisimaneqarnissaa pingaartorujussuusoq. Imerajuttuuneq naqisimaneqarnerlu kisimik aqqusaarneqarsimanngillat. Aamma ajugaasarsimavugut tamannalu Qasapip ulluani kingullermi sammineqarpoq, Simon Løvstrøm, Mooqqu, oqarpoq.
Inuusuttunut tusarnaartitsinerit Ilulissani, Sisimiuni, Nuummi Paamiunilu pissapput.
Erinarsortuupput Randi Broberg aamma Berthinnguaq Olsen (Mukku). Nipilersortuupput Ole Kristiansen, Nuunoq Johansen, Gustav Ostermann aamma Julius Larsen. Ángu Olsen nipilerisuuvoq qulliillu Qillaq Johansenimit Nikki Nielsenimillu aqunneqarput.