Kalaallit qallunaatsiaallu akiuunnerat cd-nngorpoq
"Qasapip ullua kingulleq" oqaluttuaavoq kalaallit qallunaatsiaallu akersuunnerannik. Oqaluttuatoqaq sallu pissutigalugu kalaallit qallunaatsiaallu ikinngutigiissimagaluit toqoraaffiusumik akersuunnermik avissaarnerat Villads Villadsenip oqaluttuareqqissimavaa.
Villads Villadsenip taalliamini oqaluttuamik imalimmi kalaallit siulersortaata Qasapip aamma qallunaatsiaat siulersortaata Trollep akersuunneq qanilliartortillugu eqqarsaatit atorsimasaat taalliarisimavai. Eqqarsaatit akiniaarusunnermik ilaatigut imaqangaarsimapput.
"Inerpugut tamatta ajungaalluarpugut. Nungupput maanna kiisami akerarisavut. Nuna pigissavarput aamma kinguaassavut tamaani naalagaajumaarput kinguaassavut", akiuunneq naammassisoq Qasapi taama oqartinneqarpoq.
"Qasapip ullua kingulleq" kulturip illorsuani Katuami takutinneqarpoq 2001-mi 2004-milu tassani Hans A. Hansen erinniortuulluni.
Maanna rock-imik nipilersortartup Ole Kristiansenip 2005-mi aallartilluni nutaamik erinalersimavai. Taama pisoqarnissaa Villads Villadsenip 2006-mi toqussi sioqqullugu akuerereersimavaa.
- Assut tupaallaatigaa suliap ilimagisamit oqinnerunera, Ole Kristiansen KNR.gl-imut oqarpoq.
Taanna ukiut ingerlaneranni erinniassatut aallartitaraluarpassuarminik unitsitsiinnartarsimavoq Aasianni immiussisarfimmini sulerujuuleraangami.
- Una suliaq imminut piumaffiginarsimavoq imminut oqarfiginarluni tassa suliaq maanna naammassisariaqarpoq tamannalu uannut aamma peqqinnartuusimavoq, Ole Kristiansen oqarpoq.
Suliamik ingerlatseqataasoq Inuit Teatret maanna Katuaq suleqatigalugu aningaasanik katersuiniarpoq isiginnaagassiat Katuami takutinneqarnissaa siunertaralugu. Qaqugu takutinneqassanersoq suli ullulerneqanngilaq.
- Taanna nipilersuutigaluni isiginnaartitsissutigineqarsinnaavoq maannalu nipilersoqatigisakkakka piareersimapput nipilersornissamut isiginnaartitsisartut erinarsortuliullugit, Ole Kristiansen oqarpoq.
Villads Villadsen suli inuusuttuulluni taalliamik tassannga oqaluttuamik imalimmik allapoq Tasiilami ajoqiutilluni 1938-ip missaani. Allakkusuummerneralu pivoq ajuallannartumik misigisaqarnermi kingorna. Angallammut pajuttaammut ikisimavoq aallarnerminni akiliiniarluni taama iliortarneq taamanikkut ileqquummat.
- Kisianni angallatip naalagaata qallunaat naveerpaanga oqaatsillu inunnut atorneqarnissaminnut tulluanngivissut uannut atorlugit. Namminersulivinnissamik eqqarsaat ilunni taamani pinngorpoq, Villads Villadsen isiginnaagassiap Katuami takuteqqaarneqarnissaa sioqqullugu Sermitsiamit oqaloqatigineqarluni oqarpoq.
Simon Løvstrøm Mooqqu maanna qallunaaq dramaturi isumasiorlugu sulivoq Qasapip ulluata kingulliup isinnaagassiatut suliarinnginnerani.
