Kalaallit qallunaatsiaallu akersuunnerat nipilersuuserlugu isiginnaartitsissusiaraat

Ole Kristiansen Inuit Theatremilu pisortaq Simon Mooqqu Løvstrøm Danmarkimut Ole Kristiansenip erinniai, aappaagu isiginnaartitsissutigineqartussat, saqqummeriaannanngorlugit nipigissariartorpaat.

Villads Villadsenip taalliaa oqaluttuamik imalik "Qasapip ullua kingulleq" qallunaatsiaat kalaallillu akornanni akersuunnermik oqaluttuamut tunngasoq nipilersuuserneqarsinnaanngorlugu erinniorpaa.

- Taallamut, utoqqaat qanga oqaaserisaannik oqaasertalimmut, erinniorneq pissanganartumik unammillernarpoq, Ole Kristiansen KNR-imut oqarpoq.

Erinnat ilaat Ole Kristiansenip nipilersoriaasiatut erinniaapput, erinnalli allat pattagiaq keyboard atornerullugu erinniaallutik.

Isiginnaartitsissut "Qasapip ullua kingulleq" kulturikkut illorsuarmi Katuami 2001-imi 2004-milu, Hans A. Hansenip erinniai tunngavigalugit suliaq takutinneqarpoq. Simon Løvstrøm Ole Kristiansenilu Villads Villadsenip taalliaanut nutaaliamik erinniorsinnaanerlutik 2005-imi aperimmata akuerivai, taalliai atuaganngorluni saqqummernikuuvoq.

- Kikkut erinarsussanersut isiginnaartitsissanersullu oqaatigisinnaanngikkallarparput. Isiginnaartitsissusiarli aappaagu ukiakkut takutinneqassasoq kulturikkut illorsuaq Katuaq isumaqatigiissuteqarfigisimavarput, Simon Mooqqu Løvstrøm oqarpoq.

Sapaatip akunnerani uani nipilersukkat saqqummeriaannanngorlugit Danmarkimi nipigissarneqassapput. Pilersaarutillu malillugit nipilersukkat cd-nngorlugit Olsen Musicimit novembarimi saqqummersinneqassallutik.

Suliamut Nuna Fonden aningaasatigut tapersersuivoq.