USA-p isertortumik paasiniaasarfia, CIA, paarnaarussanik angallassisarnermini Kalaallit Nunaata silaannartaatigut ingerlaartarsimanersoq oqallisaaleruttorfiani allakkat pinngorput.
USA-p Danmarkimi aallartitarisimasaata, James P. Cainip, Kalaallit Nunaat "pingaarutissuartut" taamanikkut taagaa, Atuagagdliutini ippassaq saqqummersuni allaaserineqarpoq.
James P. Cain aviisimit Berlingske Tidendemit apersorneqarluni oqaluttuarpoq socialdemokratip Helle Thorning-Schmidtip qinersinermi ajugaasinnaanissaa, kinguneranillu Danmarkimi politikkikkut nikittoqarnissaa, ernummatigalugu præsidentiusimasumut George W. Bushimut 2007-imi allassimalluni.
- Helle Thorning-Schmidtip SF aamma De Radikale naalakkersuisoqatigalugit politikki USA-mit kissaatigineqanngitsoq ingerlatilissagaa ernummatigigaluarpara. James P.Cain aviisimut oqarpoq.
James P. Cainip allakkat Danmarkimi pissutsinut tunngasut 297-init amerlanerit allassimavai, allakkalli qanorpiaq imaqarnersut kialuunniit ilisimanngilaa, taakkulu Danmarkimiit tamanut saqqummiutissallugit Wikileaks ilisimatitsinikuuvoq.