Espersen: Kalaallit politikerii namminiilivinnissamit tappiillisinneqaqqapput
Tamanna Jyllands-Postenip oqallitsitsiffigisartagaani allaaseraa.
Taassuma kalaallit politikerii kalaallit inuiaqatigiit danskit naalagaaffianit tapersiissutinik ukiumut 4 milliardit missaanniittunik pissarsisarunnaarnissaat eqqarsaatersuutiginagu namminiilivinnissamut takorluugaqarnerminnit tappiilleqqanerarlugit isornartorsiorpai.
AAMMA ATUARUK Namminersulivinnissaq takujuminaatsippara
- Allanik annertunerusunik takorluugaqarput: namminiilivinnissaq. Oqaluuserisassamut ilanngussaq politikikkut partiit tamarmik pituttorsimaffigaat. ’Namminiilivinnissaq aallartisalereerpoq. Unitsinneqarsinnaanngilaq.’ Tamarmik qiimmattaassutigaat. Kalaallit aqutsisuisa piviusoq soqutiginngilluinnarpaat.
Kalaallit Nunaanni pisortat suliffiutaasa affaasa missaasa missingersuutaat Danmarkip naalagaaffimmit tapiissuteqartarneranut pituttorsimapput. Aningaasaqarnikkut aaqqissuussinernik ilaatigullu ilinniartitaanerup iluarsartuunnissaa suli amigaataavoq, Espersen uparuaavoq.
AAMMA ATUARUK Naalagaaffeqatigiinnerput atatiinnassavarput
Kalaallilli politikeriisa tamanna ilisimagaluarlugu takunngitsuusaaginnaraat Espersen isornartorsiuivoq.
- Nuna naalagaaffimmit tapiissuteqarfigineqarani akiliisinnaajunnaassanngippat missingersuutini iluarsartuussisoqangaatsiartariaqartoq ilisimalluinnarpaat, tamannali isumaginagu piumaneqarluartunik taakkartuiinnarput.
