Minik Dahl Høegh: Kalaallit pisaritikkaluarsinnarlutik ajugaapput
Unammineq naligiiffiulermat pissanganersuaqaleraluarpoq, kalaallilli unamminerup naalivinnerani marlunnik siuaqqallutik ajugaapput.
- Unammineq aallartimmat eqqissilluta aallartippugut, kisianni unamminerup aappaani pisaritippugut, immaqa oqaatigineqarsinnaavoq unammisagut kusanaatsorujussuarmik pissusilersortut, tukattorujussuarmillu unammileriasaaratta unammineq pissanganarserujussarpoq, Minik Dahl Høegh oqarpoq nangillunilu:
Unamminerullu ingerlanerani siuaqqaannaveriarluta unammisatsinnit tikitseriasaarpugut, sukataalerlutalu, aamma qujanaavissumik Miki Heilmann naggaserlugu isertitsimmat eqqissiallaqaagut, taamaattumik unammineq naammagisimaarpara, unammisuni anføri oqarpoq.
AAMMA ATUARUK Kalaallit Uruguayimut naligiiginnangajallutik ajugaasut
Brasiliamiut tullinnguuttut
Kalaallit assammik arsarlutik unammisartuisa Brasiliamiut pingasunngorpat unnukkut nal. 20.00 unammissavaat.
- Brasiliamiut angisoorujussuupput unammissallugit nuannarunartorujussuuvoq, aqagulu unammilluarsinnaassaagut aamma periarfissat tamaasa atorlugit ajugaariaraluassaagut, massakkut semifinalimut anngutingajaqqavugut, Brasiliarmiullu unamminissaannut Canadamut unamminissatsinnut piareersaataalluarsinnaassaaq, tamannalu atorluassavarput, Minik Dahl Høegh KNR-imut oqarpoq.
