Tull-erluni takutitsinermi Lauritz Heilmann, Angutinnguaq Tittussen aamma Helge Heilmann tamarmik bronzinnapput, Kalaallit Nunaanni TaeKwondo-rtartut Kattuffiannit aallartitaq, Morten Holm, oqarpoq.
Pingasunik bronzinnanneq kalaallinit peqataasunit nuannaarutigineqaraluaqisoq, inernerit aamma pakatsissutaalaarput, tassami Lauritz Heilmann aamma Angutinnguaq Tittussen Europami pissartanngorniunnerni aamma nunarsuaq tamakkerlugu pissartanngorniunnerni siusinnerusukkut kuultinnallutillu siilvinnareernikuummata.
- Soorunami angusarissaarnerunissarput neriuutigisimagaluarparput, pissartanngorniunnerilli ingerlaneranni dommerit aalajangiinerinik naapertuutinngitsunik arlalinnik misigisaqarpugut, nunanillu allaneersut kukkusumik pineqarnmitsinnik oqalunnitsinni taperserpaatigut uagut ilumoornerarluta, Morten Holm Estlandimiit oqarasuaatikkut oqaluttuarpoq.
TaeKwondomik Europami pissartanngorniunnerni kalaallini peqataasut sinneri, Steen Rasmussen aamma John Peter Halsøe medaljannanngitsoorput, kalaallillu pissartanngorniuteqataanerat maanna naammassivoq.