Kalaallit PanAmimi normu 5-inngorput
Amerikap nunavittaani pissartanngorniunnermi pissartanngorput Argentina, normu 2-nngorput Brasiilia 3-nngorlutik Chile, taakkua nunarsuaq tamakkerlugu pissartanngorniunnissamut ingerlaqqipput.
Kalaallit Nunaata USA-llu unammineranni kalaallit unammisartui arsarnerup immikkoortuani siullermi ajugaanissartik qulakkeerpaat aqqanilinnik siuaqqagamik kalaallit unammisartui 25-nik isertitaqartut USA 14-nik.
Kalaallit unammisartui nunanut allanut unammisarnerminni USA-mut qulingiluassaa ajugaapput.
Isertitaqarnerpaavoq Angutimmarik Kreutzmann taanna aqqanilinnik isertitaqarami, nukaa Akutaaneq Kreutzmann isertitaqarnerpaat tulleraat taanna qulinik isertitaqarami.
Akutaaneq Kreutzmann unamminermi tassani isertitaqarnerpaanngikkaluarluni Amerikap nunavittaani unamminermi isertitaqarnerpaavoq, taamaalillunilu Amerikap nunavittaani assammik arsarluni unamminermi pitsaanersiukkanut toqqagaalluni.
Nunanut allanut unammisartut sungiusaasuat Niels Møller kalaallit unammisartuisa angusaat pillugit oqarpoq - kalaallit angutitaasa teknikkikkut pisinnasaat unamminernilu paasinnittarnerat nunat allat unammisartuisa pisinnasaat assigigaat.
- Timikkut pisinnaasatsigut sanngiinneruvugut, Argentina aamma Chile unammigatsigit, siunertalimmilli iliuuseqarnikkut aaqqinneqarsinnaapput, sungiusarnissamut periarfissarititaasut ajunnginnerulersinneqarpata - tassunga ilanngullugu katersorneqarnissaannut unamminissaannullu aningaasanik amerlanerusunik peqartuuppat - tassuunatigut pitsanngoriarnerusinnaavugut, Niels Møller oqarpoq.
