Kalaallit Pan Amerikamut ilaasinnaajunnaarput
- Sapinngisaq tamaat atorlugu attaveqartoqaqattaaraluartoq, kalaallit inuusuttut 21-t inorlugit ukiullit assammik arsartartut Amerikkap nunatttaani assammik arsarlutik sapaatip akunnerani tullermi pissartanngorniunnissaannut ilaasinnaajunnaarput.
Kurt Lauritsen, nunatsinni assammik arsartartut nunanut allanut unammisartuinut ataqatigiissaarisoq allappoq.
Kalaallit ilaasinnaajunnaarnerannut akisussaasuunatik, nunatsinnulli atatillugu apeqquteqarsimallutik Amerikamiut aamma nalunaarsimanerarpai.
Nunani tamalaani assammik arsartartut kattuffiata Spaniami apriilip 24-ianni ataatsimeersuarnerani, Amerikkap nunavittaani assammik arsartartut kattuffiannik nunatsinnilu assammik arsartartut kattuaffiannik ataatsimeeqateqarnissamut
nunanut allanut unammisartut kissaateqarsimapput.
Suliaq nunani tamalaani timersorneq pillugu eqqartuussivimmut anngutissagaluarpalluunniit nunatsinni assammik arsartartut kattuffia sulissutiginnikkumasoq, Kurt Lauritsen allappoq.
Aamma kalaallit nunarsuarmi pissartanngorniunnernut anngunniunnernit ilumut mattussaasinnaanersut, nunani tamalaani assammik arsartartut kattuffiannut apeqqutigineqartoq Kurt Lauritsen ilisimatitsivoq.
