Kalaallit palaseqaannarnissaat nuannaarutigineqarpoq
Naalakkersuisut siulittaasuata, Kuupik Kleistip, taama nalunaaruteqarnera kalaallinut Danmarkimiittunut nuannaajallannarlunilu toqqissiallannartutut misigiffiusoq, Bitha Metelmann oqarpoq.
Napparsimallutik sivisuumik Danmarkimiittariaqartut, tarnimikkut nappaateqarlutik Danmarkimiittut, kiisalu kalaallit parnaarussivimmiittut eqqarsaatiginerullugit, Danmarkimi kalaallit palaseqaannarnissaat pisariaqartinneqartoq, Bitha Metelmannip oqaatigaa.
- Kalaallit peqatigiiffiisa Danmarkimiittut nalliuttorsuit qanillineranni katerisimaarnerminni kalaallisut naalagiarnissaq pingaartittarpaat, Bitha Metelmann oqarpoq.
Danmarkimi kalaallit palaseqarnikkut kiffartuunneqarnerat pitsaanerulersinniarlugu naalakkersuisut aaqqiissutissanik nutaanik aappaagu nassaarniarnissartik neriuutigaat. Danmarkimi kalaallit peqatigiiffiisa maanna arlaqartut palasimit akulikinnerusumik orninneqartarnissartik kissaatigisarsimavaat, palasillu kiffartuussinerisa pitsaanerulernissaannik maanna naalakkersuisut oqariartuuteqarnerat kalaallit Danmarkimi peqatigiiffiisa kattuffiannit nuannaarutigineqarpoq, Kattuffiup INUIT-p siulittaasua, Bitha Metelmann, oqarpoq.
