Kalaallit OL-mut peqataasalernissaat qaqugu pissanersoq oqaatigiuminaappoq

Timersortartut Kalaallit Nunaanneersut Savalimmiuneersullu OL-imut peqataajartortarnissaat danskit Naalakkersuisuinit tapersersorneqaraluarpoq.

Taamaattoqassappalli Olympiadeqartarnermut Nunarsuaq Tamakkerlugu Qullersat akuerseqqaartariaqarput. Tamannalu ajornakusoorneruvoq!

Lars-Emil Johansen ima oqarpoq:

- Nunarsuaq tamakkerlugu Olympiamik aaqqissuisut qullersaasa Kalaallit Nunaata peqataasinnaasalernissaa imaaliinnarlugu akuerisinnaassaneraat soorunami oqaatigisinnaanngilara.

Danmarkimi Naalakkersuisut, Kalaallit Nunaannilu Naalakkersuisut, kissaatigisamik tamatuminnga tapersersuinerat, aamma IOC-p qullersaata aamma tusaaniarsinnaassagaa Lars-Emil Johansenip neriuutiginerarpaa.

- Naalakkersuinikkut pissutsit ullumikkut periarfissanik taamaattunik ammaassinnginnerat, Danmarkimi Timersoqatigiit Kattuffiata siulittaasuata Kai Holmip oqarneratuut, aporfigineqassappat, naalakkersuinikkut pissutsit taakku aaqqissuutissallugit periarfissaqarpoq, timersornikkut siunissami Kalaallit Nunaata Olympiadimi peqataasalernissaanut periarfissiisunik ilalerlugit, Lars-Emil Johansen oqarpoq.