Kalaallit nuukkaangamik ilinniarfissaqarnissaat pingaartuuvoq

Kalaallit Nunaanni inuusuttut inuuniarnikkut atugaat assigiinngitsorujussuupput. Inuusuttut Danmarkimut pigaangata inuuniarnikkut atugarisaasa assigiinnginnerujussuat malugineqarsinnaasartoq,

Vibeke Sieborg Ålborgimi kalaallit illuanni ilinniartunut siunnersorti DR-imut oqarpoq.

- Kalaallit inuusuttut ilaat Kalaallit Nunaanniit ilinniagaqarnissaminnik siunnersorneqareerlutik, ilinniagassartillu eqqarsaatigereerlugu tikittarput, inissaqareerlutik siunertaqarlutillu ilinniarnertik aallartittarlugu.

Ilinniartunut siunnersortip oqaatigaa kalaallit inuusuttut piareersarluarsimallutik ilinniariartut qallunaat ilinniaqaqatitik peqatigilluinnarlugit ilinniarnerminnik ingerlatsisinnaasartut.

Aammali inuusuttut ilaat pitsaanerusumik inuuneqalernissaminnik takorluugaqarlutik Danmarkimut tikittarput, taakkulu iluatsitsivallaarneq ajorput.

- Uternissaminnut bilitseqaratik tikittut, Danmarkimi pillualernissaminnik takorluugaqarlutik Danmarkiliartarput. Tikikkaangamik aningaasaateqarajunngillat, tassami aningaasaatinnguatik Danmarkimut bilitsimut atorsimasaramikkik. Inissaqaratik sunissaminnillu siunertaqaratik tikittarput. Ilinniarfinnut qinnuteqarsimaneq ajorput, allaammi ilinniagaqarnissaminnik eqqarsaateqarneq ajorlutik. Taamaalillutik nunamut takornartamut Danmarkitut ittumut tikikkaangamik, oqaatsitigullu ajornartorsiuteqaraangamik, ilinniagaqalersinnaanissartik ajornartorsiutigisarpaat, Vibeke Sieborg oqarpoq.

Kalaallit inuusuttut qasserpiaat utimut bilitseqaratik Danmarkiliartarnersut kisitsisaatigineqanngilaq.