Kalaallit Nunaata saarullia ilisimatusarfigilerpaa
Ilisimatusarnermut ministereqarfiup Ph.d-nngorniartut aqqaneq marluk ungasinngitsukkut Elitefork-rejsestipendianik, angalassutissanik 300.000 koruuninik nalilinnik tunivaat. Tunisittunut ilaavoq biolog Nina Overgaard Therkildsen, ilaatigut silap pissusaata allanngoriartornerata kinguneranik aalisakkat sananeqaatsimikkut tulluarsarsinnaanerat pillugu paasisassarsiortoq. Tassani ilaatigut Nunatsinni saarulliit sammisarai.
Ilisimatuut suliannut assigusunik suliallit suleqatigilersinaanerannut periarfissaqalerama tamanna suliariniakkannut iluaqutaaqaaq.
Oqaluttuarisaanerup ingerlanerani imarpinni pissutsinut qanorlu aalisagaqartigineranut aalisakkat sananeqaatsimikkut tulluarsartarsimanerat misissorniarparput. Sulinitsinnilu Kalaallit Nunaanni saarullik immikkut soqutiginaateqarpoq, Nina Overgaard Therkildsen oqaluttuarpoq.
Siunissami avatangiisit kissarnerulernissaanut qanoq saarullik tulluarsarsinnaanersoq misissussallugu immikkut soqutiginartippara. Kalaallit Nunaata imartaani saarulliit amerlassusaat allanngorartuarsimammat, ukiut ilaanni saarulleqarujussuartarneranut ilaannilu avataani ikiligaangata sissamut qanittumi saarulliit amerlisarnerannut suut pissutaasarnersut paasiniassallugit assut soqutiginarpoq.
Saarulliit sananeqaataat DNA aallaavigalugu qanoq alliartupallatsigisinnaanerat, immamut qanoq kissartigisunut tulluarnerat kiisalu qanoq sukkatigisumik kinguaasiorsinnaalertarnerat takuneqarsinnaasarpoq. Taamaammat Pinngortitaleriffimmi saarulliit siunnaannik qanganisarujussuarnik amerlasuunik katersugaqarmat Nina Overgaard Therkildsenip iluareqaa.
Siunnaat, saarulliup niaquata iluani kalkiusat, ujaranngornikut otolittinik taaneqartartut amerlasoorpasuit Pinngortitaleriffimmi katersugaataapput. Siunnaat qaleriiaatut isikkullit kisillugit aaliakkat qanoq utoqqaatigineri paasineqartarput. Siunnaat katersukkat qaaviniit savaneqaataat DNA immikkoortillugu misissorneqarsinnaammat, 1930-kunni, 40-kkunni 50-ikkunnilu saarulliit ineriartorssimanerat misissorneqarsinnaapput.
Misissuinerit naammassippata Nunatsinni siunissami qanoq saarulleqartigisinnaanera siumut oqaatigineqarsinnaassaaq.
Angalanissamut tapiissutit atorlugit Nina Overgaard Therkildsen Californiami Stanford Universitetimiinnissani Nuummilu Pinngortitaleriffimmi kiisalu Silap Pissusaa pillugu misissuiffimmiinnissaminut atussamaarpai.
