Kalaallit Nunaata pilersaarutaa alutorsaatigineqanngilaq

Kalaallit Nunaata sila pillugu pilersaarutaa Danmarkimi naalakkersuinermik suliallit akornanni imatorsuaq alutorsaatigineqanngilaq.

CO2-mik 2007-imiit 2020-p tungaanut 5 procentimik annikillisitsinissamik anguniagaq inuinnarnullu tunngatinneqartoq angusaqarnermik ilungersuussinerunngippallaaqaaq, taama isumaqarpoq Socialdemokratit sila pillugu oqaaseqartartuat Mette Gjerskov.

- Inuussutissarsiutinik ineriartortitsinissaq peerneqarpat, taava annikillisitsinissaq anguniagassanit pingaaruteqarnerungaartoq qulakkeerneqarsinaanngitsorlu utoqqatsissutigineqarsinnaanngilaq. 5 procentit taakkua annikilliliissutissatut oqaluuserineqartut 2007-imut tunngasuupput, taakkkualu annikitsuaraararsuullutik.

Isumaqarpunga tamanna suli ataasiarlugu misissoqqittariaqartoq anguniagaqarnissarlu ilungersuunneqarnerulluni.

Konservativiit sila pillugu oqaaseqartartuat, Per Ørum Jørgensen aammattaaq Kalaallit Nunaat pillugu oqaaseqartartuusoq aamma ajasuunngivippoq taamaattorli isumaqarluni siunnersuut isumaqatigiinniutigineqarsinnaasoq.

- Kalaallit Nunaat pineqartillugu imminut napatittumik aningaasarsiorneq ineriartornermillu suliniutit pisariaqartinneqarput taavalu taamaaginnartoqassappat siunnersuut tamanna pitsaanerunerpa siornatigut inummut ataatsimut 16-eriaammik aniatitsinissamik kissaatigineqarnerminngarnit, tamanna tassa tunngaviatigut eqqortumik sammiveqaraluarpoq, kisiannili qaanngiinnagassaanani.

Savalimmiunut ukioq 2020-mi 20 procentinik annikillisitsiniartunut sanilliussigaanni taava tamanna anguniagaqarnermik ilungersuussinerunngilaq, aappaatigullu soorunami tamanna aamma naalagaaffimmi tamavimmi assigiimmik annikillisitsinissamik suliatsinnut atasutut isigineqassaaq, taamaaliornikkullu Namminersorlutik Oqartussat danskillu naalakkersuisuisa akornanni isumaqatigiinniarnissatsinni ilaasariaqarluinnarluni.

Kalaallit Nunaata pilersaarutaa pillugu sila pillugu ministerimik, Lykke Friisimik oqaaseqartitsisinnaasimanngilagut. Taassuma tusagassiuutitigut sulisuni aqqutigalugu nalunaarutigaa Kuupik Kleistimik ataatsimeeqateqarnissani utaqqimaarlugu, kisiannili oqaatigalugu 'Kalaallit Nunaata sila pillugu suliniuteqarneq toqqarsimammagu nuannaarutigalugu'.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat