Kalaallit Nunaata nunanit allanit taarsigassarsiniartariaqarsinnaanissaa tapersersorpaat
- Aningaasanik tigoriaannarnik tamatta peqarneq ajorpugut. Isumaqarpunga ilaatigut allatut ajornartartoq, taamatut ulluinnarni inuunerput aammalu inooriaaserput annertunerusumik innarlerneqassanngippat taava sakkussat ilagisariaqartarpaat allaninngaanniit aningaasanik atorniarneq.
Nunanit allaninngaanniit atornitsigut qulakkeersinnaavarput ulluninnarni inuunianerput annertunerusumik innarlerneqannginnissaa, Jess G. Berthelsen oqarpoq.
Qeqqata Kommuniata borgmesteria Hermann Berthelsen oqarpoq, Kalaallit Nunaat nunani allani taarsigassarsinianngippat isumaginninnikkut atukkat ajorseriassasut.
- Nammineerluta aningaasat piginngikkutsigit aamma aningaasanik amigaateqarnitta nunarput unitsissanngippagu, taamaammat pingaaruteqarluinnaarpoq inuiaqatigiinnut aningaanik atorneqarsinnaasunik pissarsinissaq. Tamaammat tassuunartaatigut Naalakkersuisut iliuuseqarniarnerat uanga isumaqatigilluinnarpara. Minnerunngitsumik aamma Qeqqata Kommunia eqqarsaatigalugu, uagut massakkut atugaqarnikuunnginnatta, taava aamma arlaatigut aningaasat amerlanerusut nunatsinni kaaviiaartinnissaannut suleqataarusussuseqarsinnaavugut, Hermann Berthelsen oqarpoq.
Hermann Berthelsenip aamma erseqqissarpaa nunarput aningaasanik taarsersugassaminut atugassanik pissaarunnavianngitsoq imalu tamanna tunngavilersorpaa.
- Naalakkersuisut qanoq iliornertik nalunngilaat. Akissaarussinnaanerput annilaanngatigiinnarlugu aningaasanik kaavititsinaveersaarnissaq taanna ersigineruara. Soorlu assersuutigiinnarlugu sanaartornerit, illuliortitsernerit allallu inuiaqatigiit pisariaqartitaannik sananerit unittoorpata, taava soorunami inissaaleqisut amerlanerulissapput, minnerunngitsumik suliffissaaleqisut amerlanerulissapput taassumalu kingunerisaaanik inuiaqatigiinni artornartorsiorneq annertunerulissalluni, Hermann Berthelsen oqarpoq.
