Kalaallit Nunaata Danmarkimi umiarsualivissaa aalajangerneqangajalerpoq

Kalaallit Nunaanniit Kalaallit Nunaannullu nassiussanut Danmarkimi illoqarfimmi sorlermi umiarsualiveqarnissaq aalajangerneqangajalerpoq;

tassami illoqarfiit qinnuteqartut pingasut, tassa Esbjergip, Aalborgip aamma Aarhusip suliariumannittussarsiuussisunut neqeroorutitik ippassaq tunniuttussaavaat.

Umiarsualiviup inissisimaffissaa sivisoorujussuarmik naammassiniarsarineqarpoq, illoqarfippassuit akuutinneqarlutik. Illoqarfiilli qinigassat ukioq manna pingasuinnanngortinneqarput.

Jyllandimi illoqarfiit pingasut taakku, Esbjerg, Aalborg aamma Aarhus, tamarmik pilerisuttorujussuupput.

Taakkunani borgmesterit tamarmik Kalaallit Nunaannut angalareerput.

Illoqarfimmi sorlermi Kalaallit Nunaat umiarsualiveqassanersoq Naalakkersuisut maanna naliliivigisussanngorpaat, apeqqutaatinneqarporlu illoqarfik sorleq pitsaanerpaamik akikinnerpaamillu neqerooruteqassanersoq.

Ineqarnermut Umiarsualiveqarnermullu Naalakkersuisoq, Jørgen Wæver Johansen, siusinnerusukkut neriorsuivoq, umiarsualivik Danmarkimi illoqarfimmi sorlermiissanersoq septembari naatinnagu aalajangerneqarumaartoq.