Kalaallit Nunaat Tivolimi ullumikkut naggataarpoq
Tivolimut isaasut ippassaanitut amerlatigimmata kalaallit Tivolimi naapinneranni ulluni siullerni inuit katillugit 50.000-it isersimasut, Tivolip attaveqarnermut immikkoortortaqarfianiit Simon Verheij-ip oqaatigaa. Ippassaq isaasut ippassaanitut 25.000-erpiaasut aamma oqaatigaa. Simon Verheij-ip aamma oqaatigaa, malinnaaffigissallugit soqutigineqarnerpaat tassaasut tatsimi qajartornermik takutitsisut kiisalu tupersuit kalaallit tunisassiaannik nittarsaaviusut.
Ullumikkut pisussat aallarnerlugit ualeru pingasuniit Jam session ingerlanneqassaaq kiisalu eqquiniaanernik makitsineqassalluni, tassani suliffeqarfiit tunissutaat assigiinngitsut, soorlu nunatsinnut uterlugulu angalanerit ilaatigut akissarsiarineqarsinnaapput.
Unnuk aallarnerlugu Angu Bandinilu nipilersussapput ullorlu naggaserlugu Julie Berthelsen unnulluarpat erinarsussaaq.