Kalaallit Nunaat Tivolimi ullumi aallartissaaq
Ukiut amerlasuut ingerlanneranni aliikkusersuinerit Tivolimi isiginnaartitsisarfiit annersaanni Plænenimi ingerlanneqartarsimasut, ukiormanna isiginnaartitsisarfimmi mikinerusumi, Pantomimeteaterimi aaqqissuussinerit ulluanni siullermi ingerlanneqassappt.
Nipilersortartut Simon Lynge, Ulf Fleischer Paarisa Band nipilersoqatigalugit, Kimia, Nanook aamma Small Time Giants Pantomimeteaterimi tusarnaartitsissaput.
Elektroniskimik nipilersortartoq Nuummeersoq Aqqalu Engell tallimanngorpat arfininngorpallu Kalaallit Nunaat Tivolimi aamma nipilersussaaq.
Ullup ingerlanerani Kalaallit Nunaat Tivolimimi peqataasunut ukiukinnernut Hinnarik aamma nipilersortartoq Frederik Elsner
aliikkusersuissapput isiginnaartitsisarfimmi Pantomimeteaterimi, Kalaallit Nunaat Tivolimi aaqqissuisut nittartakkaminni taama allapput.
AAMMA ATUARUK Kalaallit Nunaat Tivolimi pisussat takukkit
Sassuma arnaanik oqaluttuaq Nuka Alice Lundip Tivolimi igalaaminermik aalisakkanik uumatitsivimmi akvariumimi saqqummiutissavaa, taanna koncertsalip ataaniippoq.
Nipilersoqatigiit Small Times Giants Kalaallit Nunaat Tivolimi ulloq naggaserlugu isiginnaartitsisarfimmi Pantomimetaterimi unnugu tusarnaartitsissapput.
Suliffeqarfiit, eqqumiitsuliortut, pinnersaasiortut, atuakkanik saqqummersitsisarfiit suliniaqatigiiffiillu assigiinngitsut suliatik paasissutissallu nerrivinni nittarsaatissavaat ullumi aqagulu.
Kalaalit Nunaat Tivolimimi aaqqissuussinerit amerlanersaat Tivolimi silami isiginnartitsisarfimmi anginermi Plænenimi aqagu ingerlanneqassapput, aqagulu unnukkut qummoroortartornersuarmik naggaserneqassaaq Koncertsalenip qalianit unnuap qeqqanut tanneq qulingiluanut.